Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde Ózbekstan xalqınıń eń áziz hám qádirli bayramlarınan biri – 1-oktyabr – Muǵallimler hám ustazlar kúni múnásibeti menen saltanatlı ilaj shólkemlestirildi.

Ilajda professor-oqıtıwshılar, fakultet jámááti hám student-jaslar qatnasıp, ustaz hám pedagoglarǵa joqarı húrmet kórsetildi.

Baǵdarlama dawamında instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov shıǵıp sóylep, ustazlıq kásibiniń muqaddesligi, jas áwladtı bárkamal insan etip tárbiyalawdaǵı sheksiz ornı haqqında toqtalıp ótti.

Sonday-aq, student-jaslar tárepinen tayarlanǵan kórkem shıǵıwlar, qosıqlar bayramǵa ózgeshe kóterińki ruwx baǵıshladı.

Ilaj sońında kóp jıllıq nátiyjeli miyneti, jaslardı ilim hám tárbiyaǵa baǵdarlawdaǵı jumısları ushın bir qatar ustazlar institut rektoratı hám kásiplik awqam komiteti tárepinen húrmet jarlıǵı hám estelik sawǵaları menen sıylıqlandı.

Bayram ilajı ustazlarǵa bolǵan sheksiz húrmet hám itibardıń ayqın kórinisi boldı.