Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakultetinde 1-oktyabr – Muǵallimler hám ustazlar kúni múnásibeti menen bayram ilajı bolıp ótti. Ilajda professor-oqıtıwshılar, tyutorlar, fakultet basshıları hám student-jaslar qatnastı.

Baǵdarlama dawamında ustazlıq kásibiniń ullılıǵı, jas áwladtı jetik insan etip tárbiyalawda muǵallimlerdiń ornı hám juwapkershiligi haqqında pikirler bildirildi. Instituttıń jaslar máseleleri hám ruwxıy-aǵartıwshılıq isler boyınsha birinshi prorektorı Quvondiq Qodirov óziniń shıǵıp sóylegen sózinde pidayı ustazlardı bayram menen qızǵın qutlıqlap, olardıń miyneti joqarı bahalanatuǵının ayrıqsha atap ótti.

Studentler tárepinen atqarılǵan qosıqlar, nama qosıqlar hám saxnalıq kórinisler ilajǵa kóterińki keypiyat baǵıshladı.

Bayram sońında bir qatar ustazlar jas áwladtı ilim hám tárbiyaǵa baǵdarlawdaǵı belsendiligi ushın institut rektoratı hám kásiplik awqam komiteti tárepinen húrmet jarlıǵı hám estelik sawǵaları menen sıylıqlandı.

Bul ilaj ustazlarǵa bolǵan húrmettiń ámeliy kórinisi sıpatında hámmede úlken tásir qaldırdı.