Qaraqalpaqstan Respublikası Ministrler Keńesinde 1-oktyabr – Muǵallimler hám ustazlar kúni múnásibeti menen bayram ilajı bolıp ótti.

Ilajda Qaraqalpaqstan Respublikası Joqarǵı Keńesiniń komitet baslıǵı Murat Atamuratov sózge shıǵıp, elimizdiń ilim, bilimlendiriw tarawlarında nátiyjeli jumıs islep atırǵan ustaz-pedagoglardı kásiplik bayramı menen qutlıqladı.

Joqarı bilimlendiriw tarawında pidayı miynet etip atırǵan, óziniń joqarı kásiplik sheberligi, jarqın qábileti hám dóretiwshiligi, watansúyiwshilik pazıyletleri menen xalqımız arasında húrmetke bólengen, belsendi hám intáker, salamat hám bárkamal áwladtı kamalǵa keltiriw, jas áwladtı Watanǵa muhabbat hám sadıqlıq ruwxında tárbiyalaw baǵdarında ayrıqsha úlgi kórsetip, tarawdıń rawajlanıwına múnásip úles qosqan bir topar joqarı oqıw orınlarınıń basshıları, ustazlar hám professor-oqıtıwshılarǵa «Joqarı bilimlendiriw aǵlası» kókirek belgileri tapsırıldı.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutınan:

– Institut rektorı – Ubbiyev Alisher Taiirovich;

– Ulıwma pedagogika kafedrasınıń docenti – Seytmuratov Qalbay Seytmuratovich;

– Milliy ideya, ruwxıylıq tiykarları hám huqıq tálimi kafedrasınıń docenti – Muratbaeva Ardaq Jubatqanovna;

– Qazaq hám túrkmen tili hám ádebiyatı kafedrasınıń professorı – Kerwenov Turǵanbay Arazmedovich «Joqarı bilimlendiriw aǵlası» kókirek belgisi menen sıylıqlandı.

Sonday-aq, ilajda tarawdaǵı nátiyjeli xızmetleri ushın institutımız akademiyalıq liceyiniń oqıtıwshısı Mamutov Marat Mámbetmuratovich «Orta arnawlı hám professional bilimlendiriw aǵlası» kókirek belgisi menen sıylıqlandı.

Barlıq sıylıqlanǵan ustazlardı ulıwma xalıqlıq bayram menen jáne bir márte qutlıqlay otırıp, aldaǵı ilimiy-pedagogikalıq jumıslarında tabıslar tileymiz.

NMPI baspasóz xızmeti.