Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde «Ashıq esikler kúni» sheńberinde studentlerdiń ata-anaları menen ushırasıw ótkerildi. Ilajǵa fakultet basshıları, professor-oqıtıwshılar, tyutorlar hám student-jaslardıń ata-anaları qatnastı.

Ushırasıw dawamında ata-analarǵa fakultette alıp barılıp atırǵan oqıw-tárbiya processleri, studentlerdiń bilim sapası, sabaqlarǵa qatnasıw jaǵdayı hám jaslardıń ruwxıy-aǵartıwshılıq jumısları haqqında tolıq maǵlıwmat berildi.

Sonday-aq, ilajda studentlerdiń qáwipsizligin támiyinlew, ásirese, ijarada jasaytuǵın jaslar ushın gúzgi-qısqı máwsimge puqta tayarlıq kóriw, jılıtıw sistemalarınan durıs paydalanıw hám záhárli gazden zıyanlanıwınıń aldın alıw boyınsha zárúr usınıslar berildi.

Ata-analar menen ashıqtan-ashıq sóylesiw tárizinde bolıp ótken ushırasıwda olardıń pikir-usınısları tıńlandı. Ilaj sońında ata-analar perzentlerine jaratılıp atırǵan sharayatlar hám itibar ushın fakultet jámáátine minnetdarshılıq bildirdi. Belsendi studentlerdiń ata-analarına húrmet jarlıqları tapsırıldı.

Bunday ushırasıwlar institut, student hám ata-analar arasındaǵı birge islesiwdi bekkemlew, jaslardıń qáwipsizligin hám tálim-tárbiya procesiniń nátiyjeliligin arttırıwda úlken áhmiyetke iye.

NMPI baspasóz xızmeti.