Ájiniyaz atındaǵı Nókis mámleketlik pedagogikalıq institutında 11-oktyabr – Xalıqaralıq qızlar kúni múnásibeti menen «Dúnyanı tınıshlıq hám jaqsılıqqa ilhamlandıramız!» atamasındaǵı ushırasıw keshesi bolıp ótti.

Ilaj qatnasıwshıları hám miymanlar dáslep institut hayal-qızlar másláhát keńesi tárepinen shólkemlestirilgen kórgizbe menen tanıstı. Qábiletli student-jaslardıń súwretlew óneri hám muzıkalıq atqarıwshılıq boyınsha sheberliklerine joqarı baha berdi.

Ushırasıw keshesinde institut rektorınıń hayal-qızlar máseleleri boyınsha másláhátshisi Sayyora Bekchanova sózge shıǵıp, qızlar arasında jámiyetlik belsendilikti arttırıw, olardı ilim, bilimlendiriw, mádeniyat hám sport tarawlarında qollap-quwatlaw, sonday-aq, unamsız sociallıq illetlerden qorǵaw máseleleriniń áhmiyetine toqtaldı.

Keshede Qaraqalpaqstan Respublikası Shańaraq hám hayal-qızlar komiteti, joqarı oqıw orınlarınıń hayal-qızlar másláhát keńesleri wákilleri qızlardıń búgingi jámiyettegi ornı, olardıń jetik qánige bolıp jetisiwinde oqıw orınlarınıń roli haqqında pikir bildirdi.

Sonday-aq, ilaj sheńberinde ilim, bilimlendiriw, mádeniyat hám kórkem óner tarawlarında joqarı nátiyjelerge erisip kiyatırǵan ilimpaz, doktorant, magistrant hám student qızlar shıǵıp sóylep, búgingi kúnde mámleketimizde hayal-qızlardıń jámiyettegi hám mámleketlik basqarıwdaǵı rolin arttırıw, olardıń bilim alıwı, kásip-óner úyreniwi hám qábiletlerin júzege shıǵarıwı ushın jaratılıp atırǵan sharayatlar tuwralı aytıp ótti.

Ushırasıw keshesinde belsendi student qızlar hám hayal-qızlar másláhát keńesiniń aǵzalarına minnetdarshılıq xatları tapsırıldı.

Ilaj talantlı qızlar atqarıwındaǵı saz-sáwbetler menen dawam etti.

NMPI baspasóz xızmeti.