Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakultetinde «Ashıq esikler kúni» sheńberinde studentlerdiń ata-anaları menen ushırasıw bolıp ótti.

Ata-analar dáslep ushırasıw sheńberinde shólkemlestirilgen kórgizbe menen tanısıp, «Sıy perde» ansambli aǵzalarınıń koncert baǵdarlamasın tıńladı.

Ilajda fakultet dekanı Ulbosın Seytjanova sózge shıǵıp, institutta studentlerdiń oqıwı, bos waqıtların mazmunlı ótkeriw, bilim hám kónlikpelerin arttırıp barıwı ushın jaratılǵan sharayatlar, fakultet jaslarınıń qolǵa kirgizip atırǵan jetiskenlikleri haqqında maǵlıwmat berdi.

Sonday-aq, profilaktikalıq inspektor Miyrigúl Narımbetova da sózge shıǵıp, jaslar arasında jınayatshılıq hám huqıqbuzarlıqlardıń aldın alıwdıń áhmiyeti haqqında aytıp ótti.

Ushırasıwda atap ótilgen máseleler, sonday-aq, ijara úylerinde jasaytuǵın studentlerdiń qáwipsizligin támiyinlew, ásirese, gúz-qıs máwsiminde záhárli gazden zıyanlanıwınıń aldın alıw baǵdarındaǵı alda turǵan wazıypalar haqqında pikir almasıldı.

Ilaj sońında belsendi student-jaslardıń ata-analarına minnetdarshılıq xatları tapsırıldı.

NMPI baspasóz xızmeti.