Xabarıńız bar, usı jıldıń 14-oktyabr kúni Prezidentimiz Shavkat Mirziyoyev basshılıǵında máhálle sistemasındaǵı reformalardı jańa basqıshqa kóteriw hám orınlarda jumıslardı nátiyjeli shólkemlestiriw máseleleri boyınsha ótkerilgen videoselektor jıynalısında 15-oktyabrden elimiz boylap «Tazalıq aylıǵı» baslanatuǵınlıǵı belgilengen edi.

Usı wazıypalar, sonday-aq, 2025-jıl – Qorshaǵan ortalıqtı qorǵaw hám «jasıl ekonomika» jılı Mámleketlik baǵdarlaması tiykarında Ájiniyaz atındaǵı Nókis mámleketlik pedagogikalıq institutında «Tazalıq aylıǵı» ilajları baslap jiberildi.

Tábiyiy pánler fakulteti jámááti hám belsendi student-jasları institutta birinshilerden bolıp baslama menen shıǵıp, fakultet imaratları átirapında abadanlastırıw jumısların alıp bardı.

Jaslar fakultet basshıları menen birgelikte iygilikli maqset jolında jám bolıp, atızlardı quwraǵan shópler, tereklerdiń japıraqlarınan tazalaw, shıǵındılardı arnawlı orınlarǵa shıǵarıp taslaw, tereklerge suw quyıw hám háklew jumısların awızbirshilik penen atqardı.

Usı aylıq sheńberinde institut hám onıń átirapındaǵı máhállelerde tazalıq akciyaları, ploggingler shólkemlestiriliwi jobalastırılǵan.

NMPI baspasóz xızmeti.