Belgili ilimpaz hám metodist, qaraqalpaq til biliminiń rawajlanıwına salmaqlı úles qosqan alım, filologiya ilimleriniń kandidatı, docent, Ózbekstan xalıq bilimlendiriw aǵlası, mehriban insan, pidayı ustaz Uzaqbergen Embergenov dúnyadan mezgilsiz kóz jumdı.

Uzaqbergen Embergenov 1938-jılı Qaraózek rayonında dúnyaǵa kelgen. 1962-jılı Qaraqalpaq mámleketlik pedagogikalıq institutınıń qaraqalpaq tili hám ádebiyatı bólimin pitkerdi.

Miynet jolın usı institutta metodist bolıp islewden baslaǵan bolsa, keyin ala Ózbekstan Ilimler Akademiyası Qaraqalpaqstan bólimi N.Dáwqaraev atındaǵı Tariyx, til hám ádebiyat institutı, Ózbekstan pedagogikalıq ilim izertlew institutınıń Qaraqalpaqstan filialında ádiwli xızmet etti.

1990-jıldıń sentyabr ayınan Ájiniyaz atındaǵı Nókis mámleketlik pedagogikalıq institutı baslawısh bilim beriw metodikası kafedrasında, 1993-jıl oktyabr ayınan usı instituttıń qaraqalpaq til bilimi kafedrasında úlken oqıtıwshı, kafedra docenti bolıp islep, ilim-bilimlendiriw tarawı ushın kóplegen shákirtlerdi tayarlawǵa salmaqlı úles qostı.

Uzaqbergen Embergenovtıń jaslar tálim-tárbiyasındaǵı jemisli miynetleri, keńpeyilligi hám joqarı adamgershilikli pazıyletleri institutımız jámáátiniń, barlıq student-jaslardıń yadında máńgige saqlanıp qaladı.

Marhumnıń jaqınları, aǵayin-tuwısqanları, kásiplesleri hám shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, jámiyetlik shólkemleri, Filologiya fakulteti hám qaraqalpaq tili kafedrası jámááti.