Paytaxtımız Nókis qalasında «Qorshaǵan ortalıqtı qorǵaw hám «jasıl ekonomika» jılı» Mámleketlik baǵdarlaması sheńberinde salamat turmıs tárizin úgit-násiyatlaw, xalqımızdıń sport penen shuǵıllanıwına múnásip sharayatlar jaratıw maqsetinde «Eco Save Aral – 2025» ǵalabalıq juwırıw marafonı bolıp ótti.

Jarısqa respublikamızdaǵı joqarı oqıw orınlarınıń studentleri, ulıwma bilim beriw mektepleriniń oqıwshıları, áskeriy xızmetkerler, sonday-aq, 7 jastan 70 jasqa shekemgi bolǵan kewilli puqaralar qatnastı.

Quwanıshlısı, usı marafonda qızlar arasında Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakulteti dene mádeniyatı tálim baǵdarınıń studentleri Ejemaya Bazarbaeva 2-orındı, Aysha Jumambetova sıylı 3-orındı iyelegen bolsa, erler arasında Azamat Orazbaev 2-orındı, Ellikqala fakulteti dene mádeniyatı tálim baǵdarınıń studenti Yuldosh Sotimboyev sıylı 3-orındı iyeledi.

Marafon juwmaǵında jeńimpaz hám sıylı orın iyeleri shólkemlestiriwshiler tárepinen diplom, medal, estelik sawǵaları hám aqshalay sıylıqlandı.

NMPI baspasóz xızmeti.