Araldı qutqarıw xalıqaralıq qorı Atqarıw komiteti Nókis filialı tárepinen respublikamızdaǵı joqarı oqıw orınlarınıń studentleri arasında «Shıǵındıdan jańa ónim» innovaciyalıq ideyalar tańlawı shólkemlestirildi.

Tańlaw eki basqıshta ótkerilip, birinshi basqıshta jeńimpaz bolǵan 12 student final basqıshında qatnastı.

Áhmiyetlisi, usı tańlawda Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 3-kurs studenti Kúmisay Qızılbaeva plastikalıq ıdıslardıń qaqpaqların qayta islew arqalı breloklar tayarlaw boyınsha «EcoKey» joybarı menen qatnasıp, sıylı 2-orındı iyeledi hám diplom jáne 5 000 000 sum jeńimpazı boldı. Sonday-aq, onıń joybarı «Eń kreativ sheshim» nominaciyası boyınsha jeńimpaz dep tabıldı.

Sonıń menen birge, usı tańlawda Tábiyiy pánler fakulteti ximiya tálim baǵdarınıń 2-kurs studenti Maftuna Jumaboeva turmıslıq hám awıl xojalıǵı shıǵındıların qayta islew arqalı ekologiyalıq taza janarmay (briket, pelet) hám organikalıq tóginler islep shıǵarıw boyınsha «EcoLife» joybarı menen qatnasıp, sertifikat penen sıylıqlandı.

Institut rektorı Alisher Ubbiyev tańlawda joqarı nátiyjelerge erisken studentlerdi qutlıqlap, olardıń innovaciyalıq joybarların bunnan bılay jetilistiriw hám ámeliyatqa keńnen engiziw boyınsha usınısların bildirdi.

NMPI baspasóz xızmeti.