Ájiniyaz atındaǵı Nókis mámleketlik pedagogikalıq institutında qábiletli studentlerdi saylap alıw hám qollap-quwatlaw, olardıń shet tillerine bolǵan qızıǵıwshılıǵın arttırıw maqsetinde inglis tilinen pán olimpiadası bolıp ótti.

Pán olimpiadasınıń dáslepki kúninde qatnasıwshılar eki shárt – mámlekettanıw, ádebiyat, grammatikalıq hám leksikalıq materiallar tiykarında dúzilgen 50 sorawdan ibarat test tapsırmaların orınlaw, sonday-aq, 15-20 minut dawamında kórkem filmnen úzindi kóriw hám mazmunın jazba túrde keminde 300 sózden ibarat formada bayanlaw boyınsha óz bilim hám kónlikpelerin sınaqtan ótkerdi.

Olimpiadanıń ekinshi kúni ózbek yamasa rus tillindegi tekstti inglis tiline awdarıw, sonday-aq, tili úyrenilip atırǵan mámlekettiń mámleketlik dúzilisi, ekonomikası hám kórkem óneri, ullı tulǵaları, jaslardıń turmısı hám usı sıyaqlılar haqqında maǵlıwmat beriw shártleri menen dawam etti.

Solay etip, pán olimpiadasınıń juwmaǵı boyınsha 1-orındı shet tili hám ádebiyatı: inglis tili tálim baǵdarınıń 3-kurs studenti Asadbek Akkiev, 2-orındı usı tálim baǵdarınıń 2-kurs studenti Laylo Ilhomova, 3-orındı usı tálim baǵdarınıń 3-kurs studenti Muyassar Dusmambetova iyeledi.

Pán olimpiadasınıń jeńimpazı respublikalıq basqıshqa jollamaǵa iye boldı.

Jeńimpaz hám sıylı orın iyeleri shólkemlestiriwshiler tárepinen xoshametlendi.