Ájiniyaz atındaǵı Nókis mámleketlik pedagogikalıq institutında bilimlendiriw procesiniń ámeliyat penen úylesimliligin támiyinlew, studentlerdiń teoriyalıq bilimlerin bekkemlew hám olardı keleshektegi kásiplik jumısqa tayarlaw maqsetinde sistemalı jumıslar alıp barılmaqta.

Házirgi waqıtta instituttıń 2-3-4-kurs studentleri «4+2» baǵdarlaması sheńberinde paytaxtımız Nókis qalası, sonıń menen birge, Nókis, Taqıyatas, Xojeli hám Ellikqala rayonlarındaǵı mektepke shekemgi bilimlendiriw shólkemleri, ulıwma bilim beriw mektepleri, akademiyalıq licey hám kásip-óner mekteplerinde qánigelik ámeliyat dawamında óz kónlikpelerin arttırmaqta.

Atap aytqanda, instituttıń Tariyx fakulteti studentleri paytaxtımızdaǵı 6-, 9- hám 23-sanlı ulıwma bilim beriw mekteplerinde ámeliyat alıp barıp atırǵan bolıp, olarǵa fakultet hám mekteplerden biriktirilgen tájiriybeli metodistler jáne ustazlar tárepinen metodikalıq járdem kórsetilmekte.

– Prezidentimizdiń «Pedagogikalıq bilimlendiriw sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararı tiykarında fakultetimizge Nókis qalasındaǵı 6-sanlı ulıwma bilim beriw mektebi biriktirilgen bolıp, bul jerde student-jaslarımız ámeliyat barısında teoriyalıq bilimlerin bekkemlep ǵana qoymastan, professor-oqıtıwshılarımız mektepte bilimlendiriw sapasın arttırıw baǵdarında ilimiy-metodikalıq jaqtan qollap-quwatlaw boyınsha birge islesiw jumısların da alıp barmaqta, – deydi instituttıń Tariyx fakulteti dekanı Maman Sarıbaev.

Qánigelik ámeliyat barısında studentler oqıwshılarǵa sabaq beriw procesinde aldınǵı pedagogikalıq texnologiyalardı qollanıw, oqıtıwshılıq jumıslarına zamanagóy qatnas jasawdı ámelde sınap kóriw imkaniyatına iye bolmaqta.

Álbette, bul arqalı studentlerde erkin pikirlew, kommunikativlik kónlikpeler hám kásiplik juwapkershilik sezimleri ele de rawajlanbaqta.

Bul baǵdardaǵı jumıslar jas qánigelerdiń kásiplik tayarlıǵın arttırıw, bilimlendiriw sapasın jaqsılaw hám bilimlendiriw sisteması ushın jetik pedagog kadrlardı tayarlawǵa xızmet etpekte.

NMPI baspasóz xızmeti.