Ájiniyaz atındaǵı Nókis mámleketlik pedagogikalıq institutında «Ózbekstan – ulıwma úyimiz» súreni tiykarında «Biz – bir shańaraq perzentlerimiz!» atamasındaǵı doslıq festivalı bolıp ótti.

Ilajǵa Ózbekstan Respublikası Ministrler Kabineti janındaǵı Imam Buxariy xalıqaralıq ilimiy-izertlew orayınıń bólim baslıǵı, tariyx ilimleri boyınsha filosofiya doktorı Jonibek Jumaev, usı oraydıń úlken ilimiy xızmetkeri Abdulvosit Mamadaliev, oraydıń diniy-aǵartıwshılıq ilajlar bóliminiń ilimiy xızmetkeri Bayozxon Mahmudov, Qaraqalpaqstan Respublikası Ministrler Keńesiniń Din isleri boyınsha bas qánigesi Xudaybergen Nezamatov, instituttıń qaraqalpaq ádebiyatı kafedrasınıń docenti Qabıl Mámbetov, institutta oqıp atırǵan túrli millet wákilleri bolǵan student-jaslar qatnastı.

Festival qatnasıwshıları dáslep Ájiniyaz muzeyinde bolıp, bul jerdegi eksponatlar menen tanıstı. Miymanlar bul jerde ullı sóz zergeri Ájiniyaz Qosıbay ulınıń ómiri hám dóretiwshiligi, sonday-aq, institut tariyxı boyınsha bahalı maǵlıwmatlarǵa iye boldı.

Sonday-aq, festival sheńberinde instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basshılıǵında «Jawızlıqqa qarsı – aǵartıwshılıq penen» ideyası tiykarında ruwxıy-aǵartıwshılıq sáwbetleri shólkemlestirilip, onda xalıqlar arasındaǵı tatıwlıq, keńpeyillik, milletler arasındaǵı doslıq hám awızbirshiliktiń jámiyettegi tutqan ornı haqqında sóz etildi.

Sózge shıqqanlar kóp milletli mámleketimizde xalıqlar arasındaǵı doslıq, tınıshlıq hám awızbirshilikti bunnan bılay da bekkemlew, jas áwladtı milletler aralıq tatıwlıq ruwxında tárbiyalaw búgingi kúnniń áhmiyetli wazıypalarınıń biri ekenligin atap ótti.

Ilaj instituttıń «Tumaris» xalıq ansambli aǵzaları hám qábiletli jaslarınıń atqarıwındaǵı koncert baǵdarlaması menen dawam etti.

NMPI baspasóz xızmeti.