Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew, olardı óz qánigeligi boyınsha jumısqa ornalastırıw, orın alıp atırǵan mashqalalardı analizlew hám aldaǵı wazıypalardı belgilep alıw máselelerine arnalǵan ushırasıw bolıp ótti.

Ushırasıwǵa Qaraqalpaqstan Respublikası Mektepke shekemgi hám mektep bilimlendiriwi ministrligi, Kámbaǵallıqtı qısqartıw hám bántlik ministrligi, Joqarı bilimlendiriw, ilim hám innovaciyalar ministrligi, «Ózmilliybank» AJ Qaraqalpaqstan Respublikası filialı, sonday-aq, Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikası Keńesiniń wákilleri, pitkeriwshi student-jaslar qatnastı.

Ilajda instituttıń oqıw isleri boyınsha prorektorı Muxtar Ibragimov búgingi kúnde jaslardı jumıs penen támiyinlew, olardıń miynet bazarındaǵı básekige shıdamlılıǵın arttırıw tikkeley mámleketimiz basshısınıń qadaǵalawındaǵı áhmiyetli máselelerdiń biri ekenligin atap ótip, bul baǵdarda qabıl etilip atırǵan qarar hám pármanlar haqqında maǵlıwmat berdi.

Ayrıqsha atap ótiw orınlı, bul baǵdarda Nókis mámleketlik pedagogikalıq institutında nátiyjeli jumıslar ámelge asırılmaqta. Atap aytqanda, ótken 2024-2025-oqıw jılında instituttı ulıwma 4369 student pitkerip shıqqan bolsa, házirgi kúnge shekem sonnan derlik 93 procent pitkeriwshi óz qánigeligi boyınsha jumısqa ornalastırıldı.

Pitkeriwshilerdiń tiykarǵı bólegi mektepke shekemgi hám ulıwma bilim beriw mákemelerinde, sonday-aq, joqarı bilimlendiriw hám basqa da sociallıq tarawlarda xızmet etpekte. Basqa da pitkeriwshilerdiń bántligin támiyinlew maqsetinde tiyisli shólkemler menen birgelikte mánzilli jumıslar alıp barılmaqta.

Institutta pitkeriwshilerdiń jumısqa ornalasıwına kómeklesiw, isbilermenlik baslamaların qollap-quwatlaw hám júzege shıǵarıw maqsetinde «Karyera orayı» jáne «Keleshekke qádem» orayı shólkemlestirilgen. «Keleshekke qádem» orayı menen birgeliktegi ótken oqıw jılında pitkeriwshi studentlerdiń biznes ideyaların ámelge asırıw nátiyjesinde ulıwma 59 studentke 1 milliard 633 million sumlıq jeńilletilgen kredit qarjıları ajıratılıp, isbilermenlik jumısların baslawǵa tiykar jaratıldı.

Ushırasıwda sózge shıqqanlar usınday imkaniyatlardan nátiyjeli paydalanıw arqalı tabısqa erisiw boyınsha usınısların bildirdi.

Ilajda pitkeriwshi jaslar ózlerin qızıqtırǵan sorawlarǵa qánigelerden tiyisli juwaplar aldı.

NMPI baspasóz xızmeti.