Ájiniyaz atındaǵı Nókis mámleketlik pedagogikalıq institutında jámiyetimizde dábdebeli toylar hám basqa shańaraqlıq máresimlerdi ıqshamlastırıw, milliy úrp-ádetlerge say túrde ótkeriw máselelerine arnalǵan ushırasıw bolıp ótti.

Ilajǵa qala hám rayonlardaǵı mákan puqaralar jıyınlarınıń jetiligi, kóshe biyleri, belsendi nuranıylar hám hayal-qızlar qatnastı.

Ushırasıwda Respublikalıq Ruwxıylıq hám aǵartıwshılıq orayı Qaraqalpaqstan Respublikası bóliminiń baslıǵı T.Atamuratov, Qaraqalpaqstan Respublikası Shańaraq hám hayal-qızlar komitetiniń baslıǵı M.Ahmedova, Qaraqalpaqstan musılmanları qazıyatınıń qazısı B.Razov, «Nuranıy» qorı Qaraqalpaqstan bóliminiń baslıǵı T.Abdijabbarov sózge shıǵıp, mámleketimizde milliy dástúr hám qádiriyatlarımızdıń mánis-mazmunın durıs úgit-násiyatlaw máselesi ústin ekenin atap ótti.

Ilaj barısında Prezidentimiz basshılıǵında ótkerilgen videoselektor májilisinde sońǵı jıllarda jámiyette baqlanıp atırǵan ısırapgershilik, dábdebe, dańqparazlıq hám ólshemdi saqlamaw sıyaqlı unamsız jaǵdaylarǵa shek qoyıw, toy hám shańaraqlıq máresimlerde artıqsha qárejetlerdi azaytıw arqalı «ıqshamlastırıw» mádeniyatın keńnen úgit-násiyatlaw zárúrligi atap ótildi.

Ushırasıwda Respublikalıq Ruwxıylıq hám aǵartıwshılıq orayı, Ózbekstan máhálleleri awqamı, Ózbekstan Respublikası Din isleri boyınsha komiteti, Ózbekstan musılmanları basqarması, Shańaraq hám hayal-qızlar komiteti, «Nuranıy» qorı hám basqa da mápdar shólkemler menen birgelikte jámiyette salamat ortalıq keypiyatın qáliplestiriwge baǵdarlanǵan ruwxıy-aǵartıwshılıq úgit-násiyat ilajların ótkeriw boyınsha ilajlar baǵdarlaması islep shıǵılǵanı málim etildi.

NMPI baspasóz xızmeti.