Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde student-jaslar arasında kiberjınayatlardıń aldın alıw, sonday-aq, jınayatshılıq hám huqıqbuzarlıqlar profilaktikası máselelerine arnalǵan úgit-násiyat ushırasıwı shólkemlestirildi.

Ilajǵa institut profilaktikalıq inspektorı Miyrigúl Narımbetova, fakultet dekanınıń orınbasarı Ikram Zarlıkov, tyutorlar hám studentler qatnastı.

Ushırasıw dawamında jaslar arasında internetten paydalanıw mádeniyatı, jeke maǵlıwmatlardı qorǵaw, sociallıq tarmaqlarda aldawshılıq jaǵdaylarınıń aldın alıw sıyaqlı máseleler sóz etilip, kiberjınayatshılardıń túrli hiylelerine aldanıp qalmaw ushın tiyisli kónlikpeler berildi. Sonıń menen birge, jaslar arasında jınayatshılıqqa alıp keletuǵın faktorlar, huqıqbuzarlıqlardıń unamsız aqıbetleri hám jaslardıń huqıqıy sawatlılıǵın arttırıw máselelerine ayrıqsha dıqqat qaratıldı.

Úgit-násiyat ushırasıwında profilaktikalıq inspektor tárepinen keltirilgen turmıslıq mısallar hám videomateriallar arqalı studentler arasında sergeklikti arttırıwǵa xızmet etetuǵın usınıslar berildi.

Ilaj juwmaǵında qatnasıwshılardıń sorawlarına tolıq juwaplar berilip, tiyisli úgit-násiyat materialları tarqatıldı.

Institutta bul baǵdardaǵı ushırasıwlar fakultetler kesiminde dawam etedi.

NMPI baspasóz xızmeti.