Búgin, 12-noyabr kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Sport ministrligi, sonday-aq, Joqarı bilimlendiriw, ilim hám innovaciyalar ministrligi tárepinen joqarı oqıw orınları studentleri arasında ótkerilgen «Bes baslama olimpiadası» sport jarıslarınıń Qaraqalpaqstan Respublikası basqıshı jeńimpazların sıylıqlaw máresimi bolıp ótti.

Jaslar arasında ǵalabalıq sport jarısların sistemalı shólkemlestiriw arqalı salamat turmıs tárizin keń túrde úgit-násiyatlaw, olardı ǵalabalıq sportqa tartıwdı jańa basqıshqa kóteriw maqsetinde ótkerilgen sport jarıslarında studentler stol tennisi, jeńil atletika, mini futbol, voleybol hám stritbol boyınsha jekelik jáne komandalıq túrde qatnasıp, óz imkaniyatların sınaqtan ótkerdi.

Ilajda sózge shıqqanlar xalqımız, sonıń ishinde, jaslar arasında sporttı keń en jaydırıw maqsetinde ámelge asırılıp atırǵan reformalar hám olardıń ámeliy nátiyjeleri haqqında aytıp ótti.

Solay etip, «Bes baslama olimpiadası» sport jarıslarınıń Qaraqalpaqstan Respublikası basqıshı jeńimpazları hám sıylı orın iyelerine dárejeli diplomlar jáne sport formalarınan ibarat sawǵalar tapsırıldı.

Jeńimpazlar respublikalıq basqıshqa jollamanı qolǵa kirgizdi.

NMPI baspasóz xızmeti.