Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakultetinde 14-noyabr – Xalıqaralıq logopedler kúni múnásibeti menen bayram keshesi bolıp ótti.

Mektepke shekemgi tárbiya hám defektologiya kafedrası tárepinen shólkemlestirilgen ilajda fakultet dekanı Muhabbat Allambergenova, kafedra baslıǵı Jamiyla Bekmanova, kafedra professor-oqıtıwshıları hám keshe miymanları student-jaslar tárepinen tayarlanǵan kórgizbe menen tanıstı.

Ilajda sózge shıqqanlar logopedler tek ǵana sóylewdegi kemshiliklerdi saplastıratuǵın qánigeler emes, sonıń menen birge, balanıń psixologiyalıq jaǵdayın qollap-quwatlaytuǵın, ózine bolǵan isenimin qáliplestiretuǵın hám oqıw procesindegi tabıslarında áhmiyetli orınǵa iye bolǵan pedagoglar ekenligin atap ótti.

Bayram keshesi sheńberinde arnawlı pedagogika: logopediya tálim baǵdarı studentleri arasında innovaciyalıq bilimlendiriw texnologiyaları, kitapqumarlıqtı úgit-násiyatlaw, sonday-aq, oqıtıw procesinde zamanagóy kórgizbe qurallarınan paydalanıw sıyaqlı shártler tiykarında tańlaw shólkemlestirildi. Bul bolsa studentlerdiń sabaq dawamındaǵı teoriyalıq bilimlerin bekkemlewge xızmet etti.

Atap ótiw kerek, bul bayram balalar sóylewin rawajlandırıw, bilimlendiriw hám sociallıq reabilitaciya tarawında pidayılıq penen xızmet etip atırǵan logoped qánigelerdiń miynetin qádirlew, olardıń jámiyettegi ornı hám áhmiyetin arttırıwǵa xızmet etedi.

NMPI baspasóz xızmeti.