Studentlik dáwir – insan ómirinde ayrıqsha waqıyalar menen eske alınatuǵın, máńgilik umıtılmas ózgeshe máwrit. Mektepti pitkerip, ómirdiń jańa basqıshına qádem taslaǵan jaslar tek ǵana bilim alıwdı emes, ómirdiń aq penen qarasın ajırata alıwdı úyrenedi. Studentlik dáwir degende lekciya tıńlap otırǵan waqıt, joqarı oqıw ornındaǵı dáslepki baqlaw imtixanları, jataqxanada bir bólek nandı bólisip jegen doslar, bayram kesheleri, kurs hám diplom jumısları sıyaqlı kóplegen waqıyalar kóz aldımızda elesleydi.

Bunday qızıqlı dáwirge jetiw – úlken baxıt. Degen menen, máńgi student bolıw heshkimniń de mańlayına jazılmaǵan. Bul dáwirler de waqıt zımıranında ótip ketedi. Sonlıqtan, studentlik jıllardı kópshilik adamlar úlken saǵınısh, ózgeshe tolqınlanıw menen eske aladı.

Búgin bul kúndi dúnyanıń kóplegen mámleketlerinde belgilemekte. Jaslar bayramı bolǵanlıqtan bul kún studentler arasında oǵada belgili. Solay eken, búgingi bayram bársheńizge qutlı bolsın! Hár bir kúnińiz jańa bilim hám jarqın esteliklerge bay bolsın! Keleshekte elimizdiń rawajlanıwına múnásip úles qosa alatuǵın óz isiniń mamanları bolıp jetilisiwińizge tileklespiz!

NMPI baspasóz xızmeti.