Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministri, polkovnik Baxtiyar Tórebekovtıń student-jaslar menen ushırasıwı bolıp ótti.

Ushırasıwǵa fakultet dekanlarınıń orınbasarları, tyutorlar, professor-oqıtıwshılar, belsendi studentler, sonday-aq, ishki isler uyımlarınıń juwaplı xızmetkerleri, profilaktikalıq inspektorlar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ushırasıwda ministr elimizde jaslarǵa baylanıslı mámleketlik siyasattıń baslı baǵdarları, keleshek iyeleri bolǵan jaslarımız arasında jınayatshılıq, huqıqbuzarlıq hám basqa da nızam buzıwshılıq jaǵdaylarınıń aldıp alıw baǵdarında ámelge asırılıp atırǵan jumıslar haqqında maǵlıwmatlar berdi.

Mámleketimizde kóp sanlı jaslardı óz ishine qamtıǵan joqarı bilimlendiriw sistemasınıń ózinde de jaslar máselesi kúnniń baslı temasına kóterildi. Olarǵa oqıw, bilim alıw, kásip-óner úyrenip, óz ústinde islep barıwı ushın múnásip sharayatlardı jaratıw, mashqalaların úyreniw hám birgelikte sheshim tabıw, jaslardıń ruwxıy-psixologiyalıq, sociallıq jaǵdayların baqlaw barıw maqsetinde barlıq joqarı oqıw orınlarında tyutor, psixolog, profilaktikalıq inspektor shtatları engizildi. Olardıń jumısları tikkeley student-jaslar menen islesiwden ibarat bolıp, bunday institutlardıń ámeliyatqa engiziliwi búgingi kúnde tarawda jaqsı nátiyjesin bermekte.

Degen menen, búgingidey globallasıw hám internet zamanında mámleketimiz keleshegi bolǵan jaslardı ózleriniń ǵárez niyetleri arqalı keri jollarǵa baslaw, jaslar qatnasıwında jınayatshılıq hám huqıqbuzarlıqlardı kóbeytiw arqalı ózleriniń maqsetlerine erispekshi bolıp atırǵan kúshler de joq emes. Ásirese, jaslardı óz izine ertip, kiberjınayat, urlıq, aldawshılıq, tonawshılıq, náshebentlik, hár qıylı psixotrop dáriler aylanısı sıyaqlı nızamǵa qayshı háreketlerdi islewge baǵdarlap atırǵanlar da ushırasıp turıptı.

Jaslar mámleketi sıpatında elimizde olardı bunday jat illetler hám nızamǵa qayshı háreketlerden saqlaw tek ǵana ishki isler yamasa usı sıyaqlı qáwipsizlik uyımlarınıń emes, nurlı keleshekti maqset etken hár bir taraw wákiliniń ádiwli wazıypası bolıp esaplanadı.

Ishki isler ministri jaslardı profilaktikalıq ilajlarǵa belsene qatnasıp, átirapta júz berip atırǵan hár qıylı unamsız hám kewilsiz hádiyselerge biypárwa bolmastan, jámiyetlik qadaǵalawdı kúsheytiwge shaqırdı.

Ilajda jaslar qatnasıwında júz bergen hár qıylı jınayatshılıq hám huqıqbuzarlıqlardıń aqıbetleri sáwlelengen prezentaciya jıynalǵanlardıń dıqqatına usınıldı. Studentler ózlerin qızıqtırǵan sorawlarǵa juwap aldı hám ministrge pikir-usınısların bildirdi.

Ushırasıwda Kiberqáwipsizlik basqarmasınıń juwaplı xızmetkerleri tárepinen kiberjınayatlardıń aldın alıw boyınsha tiyisli túsindiriw jumısları alıp barıldı.

NMPI baspasóz xızmeti.