18-noyabr – «Ózbekstan Respublikasınıń mámleketlik bayraǵı haqqında»ǵı Nızamınıń qabıl etilgen kúni hám bul sánege 34 jıl tolıwı múnásibeti menen Ájiniyaz atındaǵı Nókis mámleketlik pedagogikalıq institutında «Bir Watan, bir el, bir bayraq!» atamasındaǵı ushırasıw keshesi bolıp ótti.

Saltanatlı ilaj mámleketlik gimnler menen baslandı. Ushırasıwǵa Qaraqalpaqstan Respublikası prokuraturasınıń aǵa prokurorı Rasul Jalǵasbaev, Ádillik ministrliginiń huqıqıy málimleme sektorı bas másláhátshisi Muhabbat Xojaxmetova, instituttıń milliy ideya, ruwxıylıq tiykarları hám huqıq tálimi kafedrasınıń baslıǵı Erkin Tilewov, sonday-aq, fakultetler dekanatınıń wákilleri, professor-oqıtıwshılar, tyutorlar hám studentler qatnastı.

Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ilajda sózge shıqqanlar tárepinen atap ótilgenindey, bıyıl mámleketlik suverenitettiń belgilerinen biri bolǵan ǵárezsiz Ózbekstan Respublikasınıń mámleketlik bayraǵınıń qabıl etilgenine 34 jıl tolmaqta. Ózbekstan Respublikası Oliy Kengashiniń 1991-jıl 18-noyabrdegi gezekten tıs VII sessiyasında tastıyıqlanǵan mámleketlik bayraǵı jer júzinde ǵárezsiz Ózbekstan degen mámlekettiń bar ekenligin ańlatadı hám ózinde milliy-mádeniy dástúrlerdi jámleydi.

Bayraq ózinde pútkil Ózbekstan xalqınıń ázeliy tilek-umtılısları, erk-ıqrarı, xalqımızǵa tán miymandoslıqtı sáwlelendirgen. Mámleketlik bayraqtıń mámleketlik mákeme hám shólkemler, oqıw orınları, Ózbekstan aǵzası bolǵan xalıqaralıq shólkemler, sırt ellerdegi elshixana hám turaqlı wákilxanalardıń aldında jelbirep turıwı, hár qıylı bayram saltanatlarında, mámleketimiz wákilleri qatnasıp atırǵan xalıqaralıq kólemdegi siyasiy, mádeniy-aǵartıwshılıq ilajlarda, abıraylı sport jarıslarında watanımızdıń abıroy-mártebesi, xalqımızdıń maqtanıshın ayqın sáwlelendirip, kewillerdi tolqınlandıradı.

Mámleketlik belgiler bárqulla muqaddes hám ullı bolıp tabıladı. Óytkeni, ol xalıqtıń ótmishi, búgini hám keleshegin ózinde jámlegen watannıń simvolı esaplanadı.

Ushırasıw keshesinde jaslarımız arasında mámleketlik bayraǵımızǵa bolǵan húrmetti bunnan bılay da arttırıwdıń áhmiyeti, mámleketlik belgilerden nızamlı túrde paydalanıw qaǵıydaları tuwralı maǵlıwmatlar berildi.

Ilaj qatnasıwshılar menen pikir-almasıw hám soraw-juwaplar menen dawam etti.

NMPI baspasóz xızmeti.