Ájiniyaz atındaǵı Nókis mámleketlik pedagogikalıq institutında qaraqalpaq tiliniń ilimiy-izertleniwine salmaqlı úles qosqan ilimpaz, belgili túrkolog, filologiya ilimleriniń doktorı, professor, Qaraqalpaqstanǵa miyneti sińgen ilim ǵayratkeri Nikolay Aleksandrovich Baskakovtıń tuwılǵanına 120 jıl tolıwına arnalǵan seminar bolıp ótti.

Seminarǵa Filologiya fakultetiniń dekanı G.Begmuratova, qaraqalpaq tili kafedrasınıń professorı A.Pirniyazova, docent A.Orazımbetov, rus tili hám ádebiyatı kafedrasınıń baslıǵı N.Turabaeva, qazaq hám túrkmen tili hám ádebiyatı kafedrasınıń baslıǵı Í.Quttımuratova, professor-oqıtıwshılar, jas izleniwshiler hám studentler qatnastı.

Seminardı instituttıń qaraqalpaq tili kafedrasınıń baslıǵı Gáwhar Patullaeva kiris sóz benen ashtı.

Ilajda docentler Q.Bekniyazov, S.Shınnazarova, tayanısh doktorant U.Qayıpnazarova kórnekli túrkolog ilimpaz N.Baskakovtıń ómiri, ilimiy-pedagogikalıq hám jámiyetlik xızmetleri, qaraqalpaq tiliniń fonetika, morfologiya, sóz jasalıw, leksika, sintaksis, dialektologiya, leksikografiya sıyaqlı tarawların izertlewge qosqan úlesleri haqqında ilimiy bayanatların oqıp berdi.

Ilajda sózge shıqqanlar N.Baskakov qaraqalpaq tilin izertlew boyınsha úlken ilimiy mektep jaratqanlıǵı, qaraqalpaq til ilimi dúnyasında sarqılmas bulaq sıpatında tán alınǵan ilimiy miynetlerin jazıp qaldırǵanlıǵı, zamanlasları, shákirtleri haqqında maǵlıwmatlar berdi.

Bunnan soń Filologiya fakulteti qaraqalpaq tili kafedrası tárepinen N.A.Baskakovtıń ilimiy-pedagogikalıq xızmetlerine arnap shólkemlestirilgen pán kabinetiniń ashılıw máresimi bolıp ótti.

Qatnasıwshılar bul jerde belgili alımnıń ilimiy miynetleri kórgizbesi menen tanıstı.

NMPI baspasóz xızmeti.