Ájiniyaz atındaǵı Nókis mámleketlik pedagogikalıq institutı Jaslar awqamı baslanǵısh shólkemi Filologiya fakulteti jaslar awqamı jetekshisi Qademay Usanovanıń baslaması menen student-jaslardıń jetekshilik kónlikpelerin rawajlandırıw, olardıń bos waqıtların mazmunlı ótkeriw maqsetinde «Jańa áwlad liderleri» oqıw kursı shólkemlestirildi.

Oqıw kursı dawamında qatnasıwshılar zamanagóy liderlik koncepciyaları, kommunikaciyalıq mádeniyat, joybarlardı nátiyjeli basqarıw sıyaqlı baǵdarlar menen birgelikte mámleketlik stipendiyalar, startap joybarlar, bilimlendiriw grantları tańlawlarına qatnasıw, mobilografiya, oratorlıq sheberligi hám saxna mádeniyatı boyınsha teoriyalıq jáne ámeliy bilimlerge iye boldı.

Bul kurs dawamında studentler trenerler tárepinen ótkerilgen interaktiv shınıǵıwlar, ámeliy tapsırmalar hám toparlıq joybarlarda belsene qatnastı.

Kurs juwmaǵında pitkeriwshilerge sertifikatlar tapsırıldı. Ilajǵa instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov qatnastı hám oqıw kursınıń jaslardıń liderlik potencialın qollap-quwatlaw, olardı keleshektegi kásiplik hám jámiyetlik jumıslarǵa tayarlawdaǵı áhmiyetine toqtalıp, studentlerdiń baslamaların bárqulla qollap-quwatlaytuǵınlıǵı, olardan ámeliy nátiyjeler kútetuǵınlıǵın atap ótti.

Bul oqıw kursı studentlerdiń jetekshilik kompetenciyaların bekkemlew, olardı jámiyetlik turmısta belsene qatnasıwǵa baǵdarlawǵa xızmet etedi.

NMPI baspasóz xızmeti.