Ájiniyaz atındaǵı Nókis mámleketlik pedagogikalıq institutında studentlerdiń salamatlıǵın qorǵaw, olar arasında júz beriwi múmkin bolǵan kewilsiz jaǵdaylardıń aldın alıw maqsetinde taraw qánigeleri qatnasıwında profilaktikalıq ushırasıw shólkemlestirildi.

Ushırasıwǵa Qaraqalpaqstan Respublikası Ayrıqsha jaǵdaylar basqarmasınıń bólim baslıǵı Erbol Júzbaev, qánigesi Javlonbek Turaev, Qaraqalpaqstan Respublikası Sanitariyalıq-epidemiologiyalıq tınıshlıq hám jámiyetlik salamatlıq basqarmasınıń qánigesi Miyrigúl Qaniyazova, instituttıń jaslar tálim-tárbiyasına juwapker qánigeleri hám student-jaslar qatnastı.

Ilajda taraw qánigeleri záhárli gazden zıyanlanıw hám awqattan záhárleniwdiń baslı sebepleri, olardıń aldın alıw ilajları boyınsha tolıq maǵlıwmat berdi.

Ushırasıw dawamında studentler gaz úskenelerinen paydalanıw qaǵıydaları, jabıq bólmelerde hawa almasıwınıń áhmiyeti, záhárli gaz belgileri hám ayrıqsha jaǵdaylarda durıs háreketleniw tártibi menen tanıstırıldı. Sonday-aq, azıq-awqat ónimlerin durıs saylaw, jaramlılıq múddetine dıqqat qaratıw, ulıwmalıq awqatlanıw punktlerinde sanitariyalıq talaplarǵa ámel etiw boyınsha ámeliy usınıslar berildi.

NMPI baspasóz xızmeti.