Ájiniyaz atındaǵı Nókis mámleketlik institutında 8-dekabr – Ózbekstan Respublikası Konstituciyası qabıl etilgen kún hám Bas nızamımızdıń 33 jıllıǵına arnalǵan saltanatlı ilaj bolıp ótti.

Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı. Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ilajǵa Qaraqalpaqstan Respublikası Joqarǵı Keńesiniń Sud-huqıq máseleleri hám korrupciyaǵa qarsı gúresiw komitetiniń baslıǵı Alisher Atajanov, Qaraqalpaqstan Respublikası Ádillik ministri Elmurod Tursunov, Qaraqalpaqstan Respublikası prokuraturası baslıǵınıń birinshi orınbasarı Erpolat Qayıpbergenov, sonday-aq, professor-oqıtıwshılar hám student-jaslar qatnastı.

Sózge shıqqanlar tárepinen atap ótilgenindey, tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

1992-jılı 8-dekabr kúni ǵárezsiz Ózbekstannıń Konstituciyası qabıl etildi. Konstituciyanı islep shıǵıwda nızamshılıqtaǵı aldınǵı sırt el tájiriybeleri menen birgelikte xalqımızdıń kóp ásirlik mentaliteti, jasaw sharayatı, ata-babalardan miyras bolıp kiyatırǵan úrp-ádetleri de basshılıqqa alındı.

Konstituciyada tiykarǵı itibar insan hám onıń huqıqları jáne erkinlikleri, yaǵnıy Ózbekstan Respublikasınıń hár bir puqarasına jeke huqıq hám erkinlikler, siyasiy hám sociallıq-ekonomikalıq huqıqlardıń kepillikleri támiyinlendi.

Elimizde nızam ústinligin támiyinlew arqalı puqaralıq jámiyetin qurıw, bunıń ushın xalqımızdıń huqıqıy mádeniyatın arttırıw, xalqımızdıń búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslar ayrıqsha atap ótildi.

Tiykarǵı nızamımızda keleshek áwladlardıń bilim alıwı, kásip mamanı bolıwı, ozıq-oylı, tereń pikirleytuǵın, jetik insan bolıp jetilisiwi ushın zárúr bolǵan principler hám qaǵıydalar belgilep berilgen. Sońǵı jılları joqarı bilimlendiriw sistemasına qaratılıp atırǵan itibar hám ǵamqorlıqlar usı maqsetlerge erisiw ushın xızmet etedi.

Qaraqalpaqstanda joqarı oqıw orınlarınıń sanı sońǵı jıllar ishinde eki esege artqanı, olardıń materiallıq-texnikalıq bazasınıń jetilistiriwi, qabıllaw kvotaları sanınıń kóbeytiliwi, ásirese, sońǵı úsh jılda Qaraqalpaqstan jasların hár tárepleme qollap-quwatlaw maqsetinde 31 mıńnan aslam qosımsha maqsetli grant hám tólemli kontrakt orınlarınıń berilgenligi, ulıwma bahası 145 milliard sumlıq 2150 orınlıq studentler turaq jaylarınıń paydalanıwǵa tapsırılǵanlıǵı Konstituciyada belgilengen normalardıń ámeldegi kórinisleri bolıp tabıladı.

Usınday imkaniyatlar nátiyjesinde elimiz jasları ilim, bilimlendiriw, mádeniyat, sport hám turmıstıń basqa da salalarında úlken tabıslardı qolǵa kirgizip kelmekte.

Ilaj dawamında instituttıń milliy ideya, ruwxıylıq tiykarları hám huqıq tálimi kafedrasınıń baslıǵı Erkin Tilewov, magistrant Shuhrat Atamuratov Ózbekstan Respublikası Konstituciyasınıń qabıl etiliw tariyxı, kirgizilgen ózgerisler, sonıń ishinde, 2023-jıl 30-aprel kúngi ulıwma xalıqlıq referendum tiykarında Bas Nızamımızdıń jańa redakciyada qabıl etilgenligi, ondaǵı belgilengen normalardıń búgingi turmısımızdaǵı áhmiyeti haqqında bayanatlar jasadı.

NMPI baspasóz xızmeti.