Húrmetli student-jaslar, qádirli ata-analar, áziz ustazlar hám pedagoglar!

Búgingi globallasıw sharayatında jaslar sanasına hár qıylı zıyanlı ideyalar sińdirilip atırǵan, informaciya aǵımı sheksiz kúsheygen bir waqıtta hámmemizdiń eń áhmiyetli wazıypamız – jámiyetimizdi, ásirese, keleshek qurıwshıları esaplanǵan jaslarımızdı túrli illetlerden, sonıń ishinde, náshebentlik hám narkojınayatlardıń ayanıshlı aqıbetlerinen qorǵawdan ibarat.

Náshebentlik – bul tek bir insannıń keleshegin joq etetuǵın illet ǵana bolıp qalmastan, sonıń menen birge, pútkil shańaraq, máhálle, jámiyettiń tınıshlıǵı, salamatlıǵı hám abadanlıǵına keri tásir etetuǵın qáwip bolıp tabıladı. Sonlıqtan, bul máselede tek ǵana rásmiy mákemeler emes, solardıń qatarında hár birimiz juwapker ekenimizdi umıtpawımız kerek.

Áziz student-jaslar!

Sizler – Watanımız kelesheginiń tiykarı, innovaciyalıq ideyalar, rawajlanıw hám intellektuallıq potencial tımsalısız. Sizlerdiń hár bir qádemińiz bizler ushın áhmiyetli. Bárqulla yadıńızda tutıń, náshebentlik hár qanday jetiskenlikti, miynetti, arzıwlarıńızdı bir demde joq etetuǵın illet esaplanadı. Onıń «bir mártelik sınap kóriw» degen aldawlı kórinisi de negizinde úlken joǵaltıwdıń baslanıwı bolıp tabıladı.

Ózińizdi saqlań, teńleslerińizdi eskertiń, zıyanlı illetlerge «joq» dep aytıw – bul mártliktiń belgisi. Ilimge, salamat turmıs tárizine, ruwxıy páklikke sadıq bolıń. Biz bárqulla sizlerdi qollap-quwatlaymız.

Húrmetli ata-analar!

Perzentińizdiń ómiri, tárbiyası, keleshegi eń aldı menen sizlerdiń itibarıńız, mehirińiz, qadaǵalawıńız járdeminde qáliplesedi. Búgingi jedel informaciyalıq ortalıqta perzentlerimiz kóbinese túrli qáwipli aǵımlar hám zıyanlı ádetler tásirine dus keliwi múmkin. Usınday jaǵdayda perzentińizdiń keypiyatı, dosları, bos waqtın qalay ótkerip atırǵanı menen turaqlı qızıǵıp turıń. Olar menen shın júrekten sáwbetlesiń, isenimine erisiń.

Náshebentliktiń aqıbetleri haqqında ashıq sáwbetlesiw ótkeriń. Óz waqtında baqlaw hám qollap-quwatlaw – eń baslı profilaktika ekenin umıtpań. Bizler, institut jámááti, sizler menen birgelikte perzentlerimizdi hár qanday qáwipten saqlawǵa tayarmız.

Ádiwli ustazlar hám pedagoglar!

Jaslardıń kewline jol tabatuǵın, olardıń ómirinde eń úlken órnek bolatuǵın adamlar – bul sizler bolasız. Sonlıqtan, náshebentliktiń aldın alıwda pedagoglardıń ornı ayrıqsha.

Studentlerdiń psixologiyalıq jaǵdayın baqlap barıw, olar menen individual islew oǵada áhmiyetli. Sabaq dawamında salamat turmıs tárizi, juwapkershilikti sezingen halda qarar qabıl etiw, zıyanlı ádetlerden tıyılıw máselelerine jiyi túrde itibar qaratıwıńız kerek. Olarǵa iseniw, mehir hám ruwxıy járdem beriw – jaslardı túrli illetlerden qorǵawdıń eń nátiyjeli jolı esaplanadı.

Hámmemiz birgelikte jaslardıń salamat, bilimli, iygilikli maqsetlerge qaray talpınıp jasaytuǵın bolıp kamalǵa keliwi ushın bir komanda bolıp háreket eteyik! Náshebentlik hám narkojınayatlarǵa qarsı gúresiwde bizlerdiń birlesken háreketimiz eń úlken kúsh esaplanadı.

Jaslarımızdıń keleshegi – hámmemizdiń juwapkershiligimiz!

Húrmet penen,

Alisher Ubbiyev,
Ájiniyaz atındaǵı Nókis mámleketlik pedagogikalıq institutı rektorı.