Belgili pedagog, lingvist ilimpaz, pidayı ustaz, Ájiniyaz atındaǵı Nókis mámleketlik pedagogikalıq institutı rus tili hám ádebiyatı kafedrasınıń docenti Xoshanov Bazarbay Xoshanovich usı jıldıń 4-dekabr kúni mezgilsiz dúnyadan ótti.

Bazarbay Xoshanov óz ómirin ilim hám aǵartıwshılıqqa xızmet etiwge baǵıshladı. Kóp jıllıq oqıtıwshılıq tájiriybesi, tildi tereń biliwi hám filologiyaǵa bolǵan súyispenshiligi onı kafedranıń eń húrmetli qánigelerinen birine aylandırdı. Ilimli lingvist hám itibarlı ustaz sıpatında ol studentlerdiń júrek tórinen orın alıp, olardıń sóylew mádeniyatı, sózge húrmet dárejesin arttırıw hám kásiplik jaqtan ósiwine tiykar jarattı.

Kásiplesleri Bazarbay Xoshanovtı principial, keńpeyil hám bárqulla qolınan kelgen járdemin ayamaytuǵın miyirman insan sıpatında eske aladı. Onıń miynet súygishligi, keń pikirli danalıǵı hám óz jumısına sadıqlıǵı onıń menen birge islegen kásiplesleri hám tálim-tárbiya alǵan shákirtlerine órnek bolıp esaplanadı.

Ustaz Bazarbay Xoshanovtıń jarqın esteligi júreklerimizde máńgi saqlanıp qaladı.

Marhumnıń shańaraq aǵzaları, jaqın aǵayin-tuwısqanları hám shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, Filologiya fakulteti, rus tili hám ádebiyatı kafedrasınıń miynet jámááti.

Marhum Bazarbay Xoshanovtıń janazası 6-dekabr kúni saat 12:00 de bolıp ótedi. Mánzil: Nókis qalası, «May awıl» MPJ Gújimli kóshesi 8-jay.