Ájiniyaz atındaǵı Nókis mámleketlik pedagogikalıq institutı dúnya júzindegi joqarı oqıw orınlarınıń turaqlı rawajlanıwın bahalaytuǵın abıroylı «UI GreenMetric World University Rankings-2025» xalıqaralıq reytinginen orın aldı.

«UI GreenMetric» xalıqaralıq reytingine dúnyanıń 105 mámleketinen 1745 joqarı oqıw ornı, sonnan Ózbekstan Respublikasındaǵı 80 joqarı oqıw ornı kirgizilgen bolıp, Nókis mámleketlik pedagogikalıq institutı dúnya júzi boyınsha 1038-, respublikamız boyınsha 44-orındı bántlegen.

Bul xalıqaralıq reyting joqarı oqıw orınlarınıń ekologiyalıq siyasatı, olardıń infrastrukturası, energiya nátiyjeliligi, shıǵındılardı basqarıw sistemaları, suwdı únemlew, transport, sonday-aq, turaqlı rawajlanıw baǵdarındaǵı bilimlendiriw hám ilimiy baslamaların analizleytuǵın eń abıroylı globallıq platformalardıń biri esaplanadı.

Instituttıń usı reytingnen orın alıwı ekologiyalıq qádiriyatlardı úgit-násiyatlaw hám turaqlı kampus ortalıǵın qáliplestiriwdegi roli artıp baratırǵanlıǵın tastıyıqlaydı.

Reyting nátiyjeleri instituttıń ekologiyalıq baǵdarlanǵan joybarlardı engiziw, ekologiya tarawındaǵı ilimiy-izertlew jumısların keńeytiw, sonday-aq, studentler hám xızmetkerler arasındaǵı ekologiyalıq mádeniyattı arttırıw boyınsha sistemalı háreketlerdi sáwlelendiredi.

«UI GreenMetric»ke aǵza bolıw xalıqaralıq birge islesiw, tájiriybe almasıw hám turaqlı rawajlanıwdı bekkemlewge baǵdarlanǵan globallıq baslamalarda qatnasıw ushın jańa imkaniyatlar jaratadı.

Ájiniyaz atındaǵı Nókis mámleketlik pedagogikalıq institutı xalıqaralıq básekige shıdamlılıǵın arttırıwǵa baǵdarlanǵan strategiyalıq maqsetlerin ámelge asırıw jolında dúnyanıń abıroylı joqarı oqıw orınlarınıń «THE», «QS» sıyaqlı xalıqaralıq reytinglerinen de orın alıw baǵdarındaǵı jumısların dawam ettirmekte.

NMPI baspasóz xızmeti.