Ájiniyaz atındaǵı Nókis mámleketlik pedagogikalıq institutında gender teńlik máselelerine baylanıslı úyreniw jumıslarınıń juwmaqların dodalawǵa baǵıshlanǵan májilis bolıp ótti.

Bul ilaj Ózbekstan Respublikasında hayal-qızlardıń jámiyettegi rolin arttırıw, gender teńligin támiyinlew hám shańaraq máseleleri boyınsha respublikalıq kólemde tastıyıqlanǵan rejeler tiykarında shólkemlestirildi. Institutta ótkerilgen genderge baylanıslı audit sheńberinde 32 bántten ibarat sorawnama tiykarında analitikalıq úyreniw jumısları alıp barıldı.

Úyreniw procesinde institutta hayal-qızlar hám er adamlar ushın teń huqıq jáne imkaniyatlardı támiyinlew baǵdarında ámelge asırılıp atırǵan jumıslar úyrenildi, hújjetler, ishki tártipler hám ámeliy mexanizmler analizlendi.

Juwmaqlawshı májiliste anıqlanǵan mashqala hám kemshilikler hár tárepleme dodalanıp, olardı saplastırıw boyınsha anıq wazıypalar belgilendi. Sonıń ishinde, ishki normativlik hújjetlerdi jetilistiriw, xızmetkerler hám studentler ushın túsindiriw hám trening sabaqların shólkemlestiriw, sonday-aq, gender teńligi máseleleri boyınsha monitoring sistemasın kúsheytiw boyınsha usınıslar alǵa qoyıldı.

Májilis qatnasıwshıları tárepinen bul baǵdarda ámelge asırılatuǵın ilajlar institut basshıları tárepinen turaqlı qadaǵalawǵa alınatuǵınlıǵı atap ótildi.

NMPI baspasóz xızmeti.