Ájiniyaz atındaǵı Nókis mámleketlik pedagogikalıq institutında elimizge belgili matematika páni oqıtıwshıları qatnasıwında «Úsh áwlad ushırasıwı» shólkemlestirildi.

Ózbekstan hám Qaraqalpaqstan Respublikalarına miyneti sińgen xalıq bilimlendiriw xızmetkeri, instituttıń matematika kafedrasınıń úlken oqıtıwshısı Jeńisbay Jumamuratov tárepinen shólkemlestirilgen ilajǵa bilimlendiriw sistemasınıń barlıq buwınların nátiyjeli jumıs islep atırǵan matematika páni oqıtıwshıları, ustazlar, jas izleniwshiler hám studentler óz ara tájiriybe almasıp, ustaz-shákirt dástúrlerin bekkemlew hám bilimlendiriw sapasın arttırıw máselelerin dodaladı.

Ushırasıwda oqıw isleri boyınsha prorektorı Muxtar Ibragimov, Anıq pánler fakultetiniń dekanı Rzamurat Jiyemuratov, matematika kafedrasınıń baslıǵı, professor Barlıqbay Prenov, sonday-aq, miyman ustazlar ózleriniń bay pedagogikalıq xızmetleri, zamanagóy bilimlendiriw metodikaları hám matematika pánin oqıtıwdaǵı nátiyjeli metodlar boyınsha pikirlerin bildirdi.

Student-jaslar ózlerin qızıqtırǵan sorawlarǵa juwaplar aldı.

Ilaj sońında barlıq qatnasıwshılarǵa institut rektoratı atınan minnetdarshılıq xatları tapsırıldı.

«Sıy perde» ansambli aǵzaları atqarıwındaǵı qosıqlar ilaj qatnasıwshılarına kóterińkilik baǵıshladı.

Bul ushırasıw áwladlar arasındaǵı úzliksizlikti támiyinlew, milliy qádiriyatlar hám kásiplik dástúrlerdi qásterlep saqlawǵa xızmet etti.

NMPI baspasóz xızmeti.