Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakulteti mektepke shekemgi tárbiya hám defektologiya kafedrası tárepinen Ózbekstan Respublikası Prezidenti janındaǵı Sociallıq qorǵaw milliy agentligi Qaraqalpaqstan Respublikası basqarması Xojeli rayonı № 3-sanlı ayrıqsha bilimlendiriw zárúrligi bolǵan balalar ushın qánigelestirilgen mektep-internatında 3-dekabr – Xalıqaralıq mayıplıǵı bolǵan shaxslar kúni múnásibeti menen sawǵalardı tapsırıwǵa arnalǵan ilaj shólkemlestirildi.

Ilajda fakultet dekanı Muhabbat Allambergenova hám kafedra baslıǵı Jamiyla Bekmanova sózge shıǵıp, Prezidentimiz tárepinen inklyuziv hám arnawlı bilimlendiriwge qaratılıp atırǵan itibar jáne imkaniyatlar, sonıń menen birge, sociallıq járdemge mútáj, mayıplıǵı bolǵan insanlarǵa ámeliy járdem kórsetiw hám olardı qollap-quwatlaw baǵdarında ámelge asırılıp atırǵan jumıslar haqqında toqtalıp ótti.

Ilaj sheńberinde arnawlı bilimlendiriwge mútájligi bolǵan balalar ushın tayarlanǵan sawǵalar tapsırıldı.

Fakultet studentleri atqarıwındaǵı kórkem-ádebiy bólim qatnasıwshılardıń kewillerine kóterińkilik baǵıshladı.