Ájiniyaz atındaǵı Nókis mámleketlik pedagogikalıq institutında «Keleshekke qádem» baǵdarlaması sheńberinde pitkeriwshi jaslardı miynet bazarına tayarlaw, olardıń finanslıq sawatlılıǵın arttırıw, isbilermenlikke bolǵan qızıǵıwshılıǵın kúsheytiw hám óz biznes ideyaların ámelge asırıw boyınsha ámeliy bilim hám kónlikpeler beriw maqsetinde seminar-trening shólkemlestirildi.

Ilajǵa «Ózmilliybank» AJ Qaraqalpaqstan Respublikası basqarmasınıń qánigesi Klara Sharipova, Biznesti rawajlandırıw bankiniń mentor-treneri Nurzada Atamuratova, «Moynaq tur» jámiyetiniń baslıǵı, «Doslıq» ordeniniń iyesi, belgili isbilermen Amina Bekjanova, sonday-aq, instituttıń pitkeriwshi kurs studentleri qatnastı.

– Institutımızda pitkeriwshi kurs studentleriniń isbilermenlik baslamaların qollap-quwatlaw hám turmısqa engiziw maqsetinde «Keleshekke qádem» orayı jumıs alıp barmaqta. Usı orayǵa múrájat etken studentlerge biznes joybarların islep shıǵıw, jeńillikli kreditler menen támiyinlew hám isbilermenlik jumısların jolǵa qoyıw baǵdarında joqarı nátiyjelerge erisip atırmız. Atap aytqanda, búgingi kúnge shekem orayımız arqalı institutımızdıń 64 pitkeriwshi studentine óz isbilermenligin jolǵa qoyıwı ushın 1 milliard 683 million sumlıq kredit qarjıları ajıratıldı, – deydi institut registrator ofisiniń menedjeri, «Keleshekke qádem» orayınıń juwapkeri Nursultan Tańbaev.

Seminar dawamında bank xızmetkerleri tárepinen jaslarǵa jeńillikli kreditler, jaslar isbilermenligin qollap-quwatlaw mexanizmleri, startap joybarlardı qarjılandırıw imkaniyatları hám bank xızmetlerinen nátiyjeli paydalanıw boyınsha tolıq maǵlıwmatlar berildi. Sonday-aq, sózge shıqqan isbilermen óz miynet jolı dawamında toplaǵan tájiriybeleri, tabıslarǵa erisiw jolları, ushırasqan qıyınshılıqlar hám olardı jeńip ótiw boyınsha ámeliy másláhátleri menen bólisti.

Ilaj juwmaǵında studentler ózlerin qızıqtırǵan sorawlarǵa tolıq juwaplar aldı.

NMPI baspasóz xızmeti.