Ájiniyaz atındaǵı Nókis mámleketlik pedagogikalıq institutı Anıq pánler fakultetinde jaslar arasında doslıq, óz ara húrmet hám mádeniy kóp túrlilikti ele de bekkemlew, studentler arasında awızbirshilik hám keńpeyillikti úgit-násiyatlaw maqsetinde «Ózbekstan – ulıwma úyimiz!» súreni tiykarında «Biz – bir shańaraq perzentlerimiz» atamasındaǵı milletler aralıq tatıwlıq hám doslıq festivalı shólkemlestirildi.

Ilajǵa Ózbekstan Respublikasına miyneti sińgen jaslar ustazı Begdulla Sultanov, «Nuranıy» qorı Nókis qalalıq bólimi baslıǵı Karamatdin Qálenderov, Respublikalıq Ruwxıylıq hám aǵartıwshılıq orayı Nókis qalalıq bóliminiń baslıǵı Qıdırbay Nuratdinov, Qaraqalpaqstan Respublikası Ministrler Keńesiniń Din isleri boyınsha bas qánigesi Húrayım Ibragimova, belgili ónermentler, professor-oqıtıwshılar, tyutorlar hám student-jaslar qatnastı.

Festivalda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov sózge shıǵıp, házirgi globallasıw dáwirinde milletler aralıq tatıwlıq, óz ara awızbirshilik, doslıq qatnasıqları jámiyetimiz hám mámleketimizdiń hár tárepleme rawajlanıwında úlken áhmiyetke iye baǵdarlardıń biri ekenligin atap ótti.

Ilaj sheńberinde elimizde milletler aralıq doslıq hám awızbirshilik ideyaların keń en jaydırıwda ayrıqsha belsendilik kórsetip kiyatırǵan instituttıń birinshi prorektorı Quvondiq Qodirov hám Anıq pánler fakulteti dekanınıń orınbasarı Xalmurat Esemuratov húrmet jarlıǵı menen sıylıqlandı.

«Tumaris» xalıq ansambli hám talantlı student-jaslar atqarıwındaǵı koncert baǵdarlaması bayram qatnasıwshılarına kóterińki keypiyat inám etti.

Bayram qatnasıwshıları hám jaslar birgelikte túrli millet wákilleriniń yoshlı qosıqlarına ayaq-oyınlarǵa túsip, festivaldıń joqarı dárejede ótiwine úleslerin qostı.

NMPI baspasóz xızmeti.