Mámleketimizdegi tuńǵısh joqarı oqıw ornı sıpatında bilimlendiriw hám xalıq xojalıǵınıń túrli tarawlarına joqarı potenciallı maman qánigelerdi tárbiyalap shıǵarıp atırǵan Ájiniyaz atındaǵı Nókis mámleketlik pedagogikalıq institutı jámááti ushın juwmaqlanıp atırǵan 2025-jıl úlken tabıslarǵa tolı jıl boldı.

Institutta jıl dawamında ayrıqsha belsendilik kórsetip, joqarı nátiyjelerge erisken professor-oqıtıwshılar, qánige xızmetkerler hám student-jaslardı xoshametlew, olardıń miynetlerin múnásip bahalaw maqsetinde sıylıqlaw máresimi bolıp ótti.

Ilajda institut rektorı Alisher Ubbiyev sózge shıǵıp, esik qaǵıp turǵan jańa 2026-jıl menen jıynalǵanlardı qutlıqladı. Juwmaqlanıp atırǵan 2025-jılda institutta oqıw procesin jetilistiriw, ilimiy-izertlew jumısların rawajlandırıw, jaslar menen islesiw, ruwxıy-aǵartıwshılıq baǵdarındaǵı ilajlardı sistemalı shólkemlestiriw boyınsha ámelge asırılǵan jumıslar jáne qolǵa kirgizilgen nátiyjelerge toqtaldı.

Álbette, bunday nátiyjelerge erisiwde elimizde joqarı bilimlendiriwge qaratılıp atırǵan itibar, jaratılǵan sharayatlar jáne hár tárepleme qollap-quwatlawdıń áhmiyeti úlkenligi atap ótildi.

Ilajda jıl dawamında ilimiy-pedagogikalıq tarawda joqarı nátiyjelerge erisken bir topar professor-oqıtıwshılar, xızmetkerler hám student-jaslar túrli nominaciyalar boyınsha sıylıqlandı.

Sonıń menen birge, «Eń belsendi jıl studenti» tańlawınıń institut basqıshı jeńimpazlarına diplomlar tapsırıldı.

Sıylıqlaw máresimi «Tumaris» xalıq ansambli, muzıkalıq tálim kafedrasınıń professor-oqıtıwshıları hám talantlı studentler atqarıwındaǵı bayram koncerti menen dawam etti.

Institutta jańa jıl bayramı ilajları dawam etpekte.

NMPI baspasóz xızmeti.