Ájiniyaz atındaǵı Nókis mámleketlik pedagogikalıq institutı Anıq pánler fakulteti texnologiyalıq tálim kafedrasınıń docenti, texnika ilimleriniń kandidatı, Ózbekstan Respublikası Joqarı hám xalıq bilimlendiriwi aǵlası, «Ardaqlı nuranıy» kókirek belgisiniń iyesi, kóplegen shákirtlerdiń húrmetli ustazı, belgili pedagog Ibragimov Bayniyaz Aytbaevich dúnyadan ótti.

Bayniyaz Ibragimov 1957-jıl Qaraqalpaqstan Respublikası Kegeyli rayonında dúnyaǵa kelgen. 1978-jıl universitetti pitkergennen soń dáslepki miynet jolın orta mektepte muǵallim bolıp islewden baslaǵan. Keyin ala 1981-1991-jılları universitette, 1991-jıldaan ómiriniń sońǵı kúnlerine shekem Ájiniyaz atındaǵı Nókis mámleketlik pedagogikalıq institutında jumıs isledi.

Ol ilimiy-pedagogikalıq miynet jolın laborantlıqtan baslaǵan bolsa, sońınan laboratoriya baslıǵı, oqıtıwshı, kafedra baslıǵı, fakultet dekanı hám ilimiy isler boyınsha prorektor sıyaqlı juwapkerli lawazımlarda ayanbay xızmet etti.

Sońǵı jıllarda instituttıń Nuranıylar keńesi baslıǵı sıpatında tálim-tárbiya hám jámiyetlik jumıslarǵa basshılıq etti.

1996-jılı Ózbekstan Respublikası Ilimler akademiyasına qaraslı Yadro fizikası institutına aspiranturaǵa túsip, 2001-jılı «Kishi elementli neyron aktivaciyalıq analiz usılında topıraqtıń agrogeoximiyalıq quramın izertlew» temasında kandidatlıq dissertaciyasın tabıslı qorǵadı.

Ilimiy-izertlew tarawında da bir qansha jetiskenliklerge erisip, bir neshe ilimiy maqalalar, oqıw hám metodikalıq qollanbalardıń avtorı boldı.

Bayniyaz Ibragimov óziniń jumısqa degen juwapkershiligi, principiallıǵı hám talapshańlıǵı  menen institut professor-oqıtıwshıları hám studentleri arasında joqarı abıroy hám húrmetke iye boldı.

Ol mámleketimizdiń bilimlendiriw tarawındaǵı alǵa qoyılǵan wazıypalardı orınlawda ayrıqsha shólkemlestiriwshilik úlgisin kórsete aldı.

Belgili pedagog Bayniyaz Ibragimov óz miynet jolı dawamında kóplegen shákirtler tayarlaw menen birge, institut jámááti aldında úlgili insan hám jankúyer ustaz sıpatında hár birimizdiń qálbimizde máńgi jasaydı.

Marhumnıń shańaraq aǵzaları, aǵayin-tuwısqanları, shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı hám miynet jámááti, jámiyetlik shólkemleri, Anıq pánler fakulteti hám texnologiyalıq tálim kafedrasınıń jámááti.