Ájiniyaz atındaǵı Nókis mámleketlik pedagogikalıq institutı Anıq pánler fakultetinde 14-yanvar – Watan qorǵawshıları kúni múnásibeti menen áskeriy taraw qánigeleri hám Awǵanstandaǵı jawıngerlik-internacionallıq háreketlerdiń qatnasıwshıları bolǵan veteranlar menen ushırasıw shólkemlestirildi.

Ushırasıwda fakultet dekanınıń orınbasarı Xalmurat Esemuratov, Arqa-batıs áskeriy okrugi veteranlar keńesi baslıǵınıń orınbasarı, serjant Baxıt Qannazarov, awǵan urısı veteranları Ońǵarbay Tóreniyazov hám Muratbay Abdullaev elimizde jaslarǵa qaratılıp atırǵan itibar, olar arasında áskeriy-watan súyiwshilik ruwxın kúsheytiw, tınıshlıq hám turaqlılıqtıń qádirine jetiw boyınsha óz pikirlerin bildirdi.

Veteranlar óz turmıslıq tájiriybeleri, mártlik hám qaharmanlıq úlgilerinen ibarat eske túsiriwleri menen bólisip, watandı qorǵaw jolındaǵı maqtanıshlı xızmet haqqında túsinikler berdi.

Ushırasıw dawamında studentlerdiń sorawlarına juwaplar berildi, áskeriy tarawdıń házirgi kúndegi rawajlanıwı hám jaslar aldında turǵan juwapkershilik haqqında sóz etildi.

Bunday ushırasıwlar studentler sanasında watanǵa muhabbat, mártlik hám pidayılıq sezimlerin ele de bekkemlewge xızmet etedi.

NMPI baspasóz xızmeti.