Ájiniyaz atındaǵı Nókis mámleketlik pedagogikalıq institutı málimleme-resurs orayında 14-yanvar – Watan qorǵawshıları kúni múnásibeti menen «Muqaddes minnet hám maqtanısh: armiyanıń keleshegi – biziń qolımızda» atamasındaǵı bayram keshesi bolıp ótti.

Keshege 50024-sanlı áskeriy bólimde múddetli áskeriy xızmetti ótep atırǵan jaslar, instituttıń Mektepke shekemgi hám baslawısh tálim, Filologiya, Pedagogika-psixologiya hám dóretiwshilik tálim fakultetiniń studentleri, tyutorlar hám málimleme-resurs orayınıń qánigeleri qatnastı.

Ilajda málimleme-resurs orayınıń direktorı G.Jiyemuratova, áskeriy bólim leytenantı M.Sayupov, Mektepke shekemgi hám baslawısh tálim fakulteti tyutorı G.Artikova, málimleme-resurs orayı bas kitapxanashısı Z.Áwezovalar Watanımızdıń ǵárezsizligi hám tınıshlıǵın saqlaw jolında xızmet etip atırǵan áskeriy xızmetkerlerdiń mártligi, juwapkershiligi, elimizde áskeriy tarawdı rawajlandırıw, jaslardı watanǵa sadıq perzentler etip tárbiyalaw baǵdarında ámelge asırılıp atırǵan reformalar haqqında shıǵıp sóyledi.

Bayram keshesi qatnasıwshı fakultetlerdiń qábiletli studentleri atqarıwındaǵı koncert baǵdarlaması, hár qıylı qızıqlı viktorinalar hám soraw-juwaplar menen dawam etti.

Ilaj sońında áskeriy bólim leytenantı M.Sayupovqa institut rektorı atınan minnetdarshılıq xatı, sonday-aq, belsene qatnasqan studentlerge málimleme-resurs orayı atınan húrmet jarlıqları tapsırıldı.