Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde biologiya keshki tálim baǵdarınıń pitkeriwshi studentleriniń pitkeriw-qánigelik jumısların qorǵaw procesi bolıp ótpekte.

– Fakultetimizde bıyılǵı jılı bakalavriattıń ximiya hám biologiya keshki tálim baǵdarları boyınsha tiyisli bilimlendiriw baǵdarlamaların tolıq tamamlaǵan hám oqıw rejesinde názerde tutılǵan barlıq sınaqlardan nátiyjeli ótken ulıwma 56 student pitkerip shıqpaqta. Sonnan 48 student qánigelik pánlerden jazba túrde mámleketlik attestaciyalıq sınaqların tabıslı tapsırdı. Búgin biologiya tálim baǵdarınıń 8 studenti pitkeriw-qánigelik jumısların qorǵamaqta, – deydi fakultet dekanı Qarjawbay Reymov.

Bul processte studentler oqıw dawamında iyelegen teoriyalıq bilim hám ámeliy kónlikpelerdi ilimiy-izleniwler arqalı kórsetiwge háreket etpekte.

Qorǵaw procesi belgilengen keste tiykarında, tájiriybeli professor-oqıtıwshılardan ibarat mámleketlik attestaciyalıq komissiyası qatnasıwında shólkemlestirilmekte. Studentler óz pitkeriw jumıslarında tańlaǵan temalarınıń áhmiyeti, ilimiy jańalıǵı hám ámeliy áhmiyetin tiykarlap bermekte, sonday-aq, komissiya aǵzalarınıń sorawlarına tolıq juwap bermekte.

Maǵlıwmat ornında atap ótiw kerek, bıyılǵı jılı institutta bakalavriattıń matematika hám informatika, fizika, ximiya, sonday-aq, biologiya keshki tálim baǵdarları boyınsha ulıwma 111 student pitkerip shıǵıwı kútilmekte.

NMPI baspasóz xızmeti.