Ájiniyaz atındaǵı Nókis mámleketlik pedagogikalıq institutında xalıqaralıq tájiriybe almasıw hám ilimiy birge islesiwdi rawajlandırıw, jaslarǵa sırt el bilimlendiriw sistemalarında oqıw boyınsha maǵlıwmatlar beriw maqsetinde ushırasıw shólkemlestirildi.

Ushırasıwǵa Koreya Respublikası Inchxon qalasında jaylasqan, dúnya júzilik reytingde 50-orında, Aziya joqarı oqıw orınları arasında 1-orındı turǵan Yonsei universitetiniń bio-medicinalıq injeneriya tálim baǵdarında grant tiykarında oqıp atırǵan 1-kurs studenti, qaraqalpaqstanlı úmitli jaslardıń biri Aynaxan Xojamuratova, sonday-aq, dúnya júzilik retingde «TOP-300»lik dizimge kiretuǵın Rossiya Federaciyası Novosibirsk mámleketlik universitetiniń aspiranturasın pitkerip, PhD dissertaciyasın tabıslı qorǵap, házirgi waqıtta instituttıń matematika kafedrasınıń oqıtıwshısı bolıp jumıs islep atırǵan Azizbek Hakimbaev, tiyisli bólimlerdiń juwapkerleri, instituttıń ziyrek studentleri qatnastı.

Ilajda ilimiy isler hám innovaciyalar boyınsha prorektorı wazıypasın waqıtsha atqarıwshısı Gúlbáhár Begmuratova sırt eldagi abıroylı joqarı oqıw orınları hám ilimiy oraylarında oqıw, izertlew jumısların alıp barıw, xalıqaralıq grantlar hám akademiyalıq mobillik imkaniyatları haqqında maǵlıwmatlar berdi.

Bunnan soń ushırasıw miymanları sırt elde bilim alıw, studentler ushın jaratılǵan sharayatlar hám zamanagóy bilimlendiriw metodları, «El-yurt umidi» qorı hám onıń wazıypaları, ilimiy-izleniw processleri, izertlew temasın saylaw, ilimiy basshı menen islesiw hám xalıqaralıq ilimiy jurnallarda maqala járiyalaw boyınsha ámeliy usınıslar berdi.

Ushırasıw soraw-juwaplar menen dawam etip, student-jaslarda úlken qızıǵıwshılıq oyattı.

NMPI baspasóz xızmeti.