Ájiniyaz atındaǵı Nókis mámleketlik pedagogikalıq institutında elimizge belgili aǵartıwshı ziyalılar, jazıwshı hám shayırlar, ilimpazlar, mádeniyat hám kórkem óner ǵayratkerleri, sport tarawınıń pidayıları qatnasıwında ruwxıy-aǵartıwshılıq hám tálim-tárbiya baǵdarında úlken áhmiyetke iye bolǵan másláhátlesiw ushırasıwı bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ushırasıwda Ózbekstan Respublikası Prezidenti Administraciyasınıń juwaplı xızmetkeri Suhrob Yusupov, Qaraqalpaqstan Respublikası Joqarǵı Keńesiniń komitet baslıǵı Murat Atamuratov, Respublikalıq ruwxıylıq hám aǵartıwshılıq orayı baslıǵınıń birinshi orınbasarı Batu Aminov, oraydıń bólim baslıǵı Ahror Saidov, oraydıń Qaraqalpaqstan Respublikası bólimi baslıǵı Tatlımurat Atamuratov sózge shıǵıp, elimizde jaslardı hár tárepleme qollap-quwatlaw baǵdarındaǵı jumıslar, jaslar menen islesiwde ilim, bilimlendiriw, mádeniyat, kórkem óner hám sporttıń ornı, qábiletli jaslardı qollap-quwatlawdıń áhmiyetin atap ótti.

Ziyalılar menen ashıq pikirlesiw ruwxında ótken ushırasıw dawamında jaslardıń ruwxıy dúnyasın bayıtıw, olardı watan súyiwshilik, milliy hám ulıwma insanıylıq qádiriyatlarǵa húrmet ruwxında tárbiyalaw, bul baǵdarda zamanagóy qatnastı engiziw máseleleri boyınsha pikir-usınıslar bildirildi.

Ilaj juwmaǵında bildirilgen usınıs hám baslamalardı ámeliyatqa engiziw, tarawlar arasında óz ara birge islesiwdi bunnan bılay da bekkemlew hám tálim-tárbiya procesin nátiyjeli shólkemlestiriw boyınsha áhmiyetli usınıslar islep shıǵıldı.

NMPI baspasóz xızmeti.