Ájiniyaz atındaǵı Nókis mámleketlik pedagogikalıq institutında jaslar arasında diniy ekstremizm hám terrorizm ideyalarınıń aldın alıw, olardıń ayanıshlı aqıbetleri haqqında túsiniklerdi keńeytiw maqsetinde «Jaslar – diniy ekstremizm hám terrorizmge qarsı» atamasındaǵı ushırasıw shólkemlestirildi.

Ushırasıwǵa Qaraqalpaqstan Respublikası Ishki isler ministrligi Terrorizmge qarsı gúresiw basqarmasınıń juwaplı xızmetkeri Nurabulla Minajov, Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarmasınıń qánigesi Jurabek Isaev, rektor másláhátshisi Ǵulamjan Ibadullaev, jaslar tálim-tárbiyasına juwapkerler, student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ushırasıw dawamında qánigeler tárepinen diniy ekstremizm hám terrorizmniń júzege keliw sebepleri, olardıń jámiyet hám jaslar sanasına unamsız tásiri, sonday-aq, bunday ideyalarǵa qarsı gúresiwde sergeklik hám ideologiyalıq immunitetti bekkemlewdiń áhmiyeti haqqında tolıq maǵlıwmatlar berildi.

Usınday háreketlerge bilip-bilmey qosılǵan jaslardıń ayanıshlı táǵdiri sáwlelengen videorolik qatnasıwshılardıń názerine usınıldı.

Ushırasıw jaslar sanasında ekstremistlik hám radikal ideyalarǵa qarsı bekkem puqaralıq poziciyanı qáliplestiriwge xızmet etiwi menen áhmiyetli boldı.

NMPI baspasóz xızmeti.