Ájiniyaz atındaǵı Nókis mámleketlik pedagogikalıq institutında Oliy Majlis Nızamshılıq palatasındaǵı Ózbekstan Ekologiyalıq partiyasınıń frakciyası jáne Ekologiya hám qorshaǵan ortalıqtı qorǵaw máseleleri komiteti tárepinen 2-fevral – Dúnya júzilik suwlı-batpaqlı aymaqlar kúni múnásibeti menen «Suwlı-batpaqlı aymaqlar – biokóptúrlilik tiykarı» atamasındaǵı seminar bolıp ótti.

Ilajǵa Nızamshılıq palatasınıń deputatları – Ekologiya hám qorshaǵan ortalıqtı qorǵaw máseleleri komiteti baslıǵınıń orınbasarı Baxıtbay Aldamuratov, Isbilermenlik, básekini rawajlandırıw hám sanaat máseleleri komiteti baslıǵınıń orınbasarı Sapargúl Utemuratova, Ózbekstan Ekologiyalıq partiyası Qaraqalpaqstan Respublikası partiya shólkeminiń baslıǵı Aysánem Begimova, Qaraqalpaqstan Respublikası Ekologiya hám klimat ózgeriwi komiteti qánigeleri, instituttıń Tábiyiy pánler fakulteti professor-oqıtıwshıları hám student-jasları qatnastı.

Seminarda atap ótilgenindey, búgin planetamızda júz berip atırǵan globallıq rawajlanıw hám klimat ózgerisleri bir neshe ekologiyalıq mashqalalardı, atap aytqanda, suw jetispewshiligin payda etpekte. Elimiz regionda jedel pátlerde rawajlanıp atırǵan, sonıń menen birge, oǵada quramalı klimatlıq sharayatlarda jaylasqan mámleket sıpatında usı ekologiyalıq mashqalaǵa beyimligi menen ajıralıp turadı.

Suw dárekleriniń kóplegen túrleri bolıp, dárya hám kóllerdi, suwlı-batpaqlı aymaqlardı globallıq klimat ózgeriwi sharayatında qurǵap qalıwdan saqlaw úlken áhmiyetke iye.

Usı tiykarda 1971-jılı 2-fevralda Irannıń Ramsar qalasında dúnya jámiyetshiligi tárepinen suwlı-batpaqlı aymaqlardı qorǵaw, bunday aymaqlarǵa keń jámiyetshiliktiń dıqqatın qaratıw maqsetinde Suwda júzetuǵın quslardıń tiykarǵı jasaw mánzili bolǵan xalıqaralıq áhmiyetke iye suwlı-batpaqlı aymaqlar haqqındaǵı konvenciya qabıllandı. Ózbekstan 2001-jıldan berli usı konvenciyanıń teń huqıqlı aǵzası esaplanadı.

Respublikamızda konvenciya sheńberinde belgilengen wazıypalar boyınsha bir neshe shólkemlestiriwshilik-huqıqıy tiykarlar, sonıń ishinde, 2019-2028-jıllar dáwirinde Ózbekstan Respublikasında biologiyalıq kóptúrlilikti saqlaw háreketler rejesi hám strategiyası islep shıǵılǵan.

Seminar dawamında sózge shıqqanlar hám bayanatshılar tárepinen elimizde sońǵı jıllarda tábiyiy aymaqlardı saqlap qalıw hám olardı qayta tiklew, ekologiyalıq ortalıqtı jaqsılaw, tábiyiy resurslardan aqılǵa uǵras paydalanıwdı támiyinlew maqsetinde qorǵalatuǵın tábiyiy aymaqlardı keńeytiw jáne rawajlandırıw boyınsha ámelge asırılıp atırǵan kompleksli ilajlar haqqında maǵlıwmatlar berildi.

Ilaj sońında qatnasıwshılar menen dárya hám kóllerdi, suwlı-batpaqlı aymaqlardı qorǵaw boyınsha soraw-juwaplar, pikir almasıwlar ótkerildi.

NMPI baspasóz xızmeti.