Ájiniyaz atındaǵı Nókis mámleketlik pedagogikalıq institutı málimleme-resurs orayında Anıq pánler fakulteti tárepinen jaslar arasında kitapqumarlıq mádeniyatın jetilistiriw hám keń úgit-násiyatlaw, sonday-aq, bilim alıwǵa bolǵan qızıǵıwshılıǵın arttırıw maqsetinde «Kitap – bilim dáregi» atamasındaǵı ruwxıy-aǵartıwshılıq ushırasıwı shólkemlestirildi.

Ushırasıwǵa belgili shayır Allayar Dármenov, fakultet dekanınıń orınbasarı X.Esemuratov, dekannıń hayal-qızlar máseleleri boyınsha másláhátshisi G.Atajanova, tyutorlar hám student-jaslar qatnastı.

Ilaj dawamında kitaptıń insan ómirindegi ornı, ilim hám oy-pikirdi rawajlandırıwdaǵı, adamlardı kámillikke baslawdaǵı áhmiyeti haqqında sóz etildi.

Sonday-aq, elimizde kitapqumarlıqtı rawajlandırıw baǵdarında ámelge asırılıp atırǵan reformalar, jaslar ushın jaratılıp atırǵan imkaniyatlar hám zamanagóy málimleme-resurs oraylarınıń jumısları haqqında maǵlıwmatlar berildi. Studentler ózleri súyip oqıǵan shıǵarmalar, jazıwshı hám shayırlar, kitap oqıw dawamındaǵı tásirleri menen bólisti.

NMPI baspasóz xızmeti.