Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakulteti ulıwma psixologiya kafedrasınıń baslaması menen 35 jıllıq nátiyjeli jumıs tájiriybesine iye, pidayı pedagog hám jetik qánige, psixologiya ilimleriniń kandidatı, professor Shınǵıs Saparovtıń 60 jasqa tolıwı múnásibeti menen «Alpıs jıl – danalıq jolı» atamasındaǵı ushırasıw keshesi shólkemlestirildi.

Kesheni kafedra baslıǵı Elmira Nurımbetova basqarıp bardı.

Ushırasıw keshesine fakultet dekanı Ulbosın Seytjanova, professor-oqıtıwshılar, magistrantlar hám belsendi student-jaslar qatnasıp, yubiley jasın belgilep atırǵan ustazdı qutlıqladı. Onıń ilimiy-pedagogikalıq hám bay turmıslıq tájiriybesi, ilim hám bilimlendiriwdi rawajlandırıw jolındaǵı pidayı xızmetleri haqqında maǵlıwmatlar berildi.

Ilaj sheńberinde qızıqlı psixologiyalıq treningler hám interaktiv shınıǵıwlar ótkerildi.

Ushırasıw keshesi qatnasıwshılarǵa kóterińki keypiyat inám etiwi menen birge, kásiplik hám turmıslıq mektep wazıypasın da atqarıwı menen áhmiyetli boldı.