Ájiniyaz atındaǵı Nókis mámleketlik pedagogikalıq institutı Tariyx fakultetinde jaslarda bekkem hám salamat isenimdi qáliplestiriw, olardı málimleme hújimleri, jat illetler hám unamsız tásirlerden qorǵaw, milliy qádiriyatlarǵa húrmet sezimin arttırıw maqsetinde student-jaslar qatnasıwında seminar shólkemlestirildi.

Ilajǵa Din isleri boyınsha komitetiniń Qaraqalpaqstan Respublikası aymaqlıq basqarması, Qaraqalpaqstan Respublikası Ishki isler ministrligi Terrorizmge qarsı gúresiw basqarması, Respublikalıq Ruwxıylıq hám aǵartıwshılıq orayı Nókis qalalıq bólimi hám basqa shólkemlerden juwapkerler qatnastı.

Seminarda sózge shıqqanlar Ózbekstan Respublikasınıń «Hújdan erkinligi hám diniy shólkemler haqqında»ǵı nızamı, sonday-aq, Ózbekstan Respublikası Prezidentiniń «Puqaralardıń hújdan erkinligi huqıqı kepilliklerin bunnan bılay da bekkemlew hám diniy-aǵartıwshılıq tarawındaǵı reformalardı jańa basqıshqa alıp shıǵıw ilajları haqqında»ǵı pármanınıń mazmunı jáne áhmiyeti haqqında maǵlıwmatlar berdi.

Jaslardıń ruwxıy dúnyasında boslıq júzege kelmewi ushın olardıń sanası hám kewilinde unamlı kózqaras, watanǵa muhabbat sezimin qáliplestiriw, zamanagóy qáwiplerge qarsı tura alatuǵın ruwxıy immunitetti kúsheytiwdiń áhmiyeti atap ótildi.

Seminar juwmaǵında student-jaslardı sergeklikke shaqıratuǵın videorolik qatnasıwshılar názerine usınıldı.