Buxara qalasında Joqarı bilimlendiriw, ilim hám innovaciyalar ministrligi janındaǵı Student hám oqıwshılardıń sociallıq belsendiligin arttırıw orayı hám birge islesiwshi shólkemler tárepinen shólkemlestirilgen «Jıldıń eń belsendi oqıwshısı» tańlawınıń respublikalıq final basqıshı bolıp ótti.

Onda tańlawdıń saylap alıw basqıshlarında hújjetleri eń joqarı bahalanǵan 25 qatnasıwshı ulıwma 5 nominaciya boyınsha, óz baǵdarlarınan kelip shıǵıp prezentaciya isledi hám jámiyetlik-siyasiy baǵdardaǵı sorawlarǵa juwap beriwge háreket etti.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutı akademiyalıq liceyiniń shet tilleri baǵdarı 2-basqısh oqıwshısı Jasmina Allabaeva «Jıldıń eń qábiletli oqıwshısı» nominaciyası boyınsha sıylı 2-orındı iyeledi.

Jeńimpazlar hám sıylı orın iyeleri ministrlik tárepinen diplom, statuetka hám qımbat bahalı sawǵalar menen sıylıqlandı.

Maǵlıwmat ushın, Jasmina Allabaeva tiykarǵı pánler olimpiadasınıń úshinshi basqıshında qaraqalpaq tili hám ádebiyatı páninen 3-orındı, sonday-aq, basqa da kóplegen respublikalıq tańlawlarda joqarı nátiyjelerge erisip kiyatırǵan úmitli jaslardıń biri. Ol inglis tili, qaraqalpaq tili hám ádebiyatı, sonday-aq, tariyx pánlerinen sertifikatqa iye. Birneshe ilimiy maqalaları respublikalıq hám xalıqaralıq ilimiy jurnallarda jarıq kórgen.

NMPI baspasóz xızmeti.