Búgin, 6-fevral kúni Ózbekstan Respublikası Joqarı bilimlendiriw, ilim hám innovaciyalar ministriniń birinshi orınbasarı Sardor Rajabov, sonday-aq, Mektepke shekemgi hám mektep bilimlendiriwi ministriniń orınbasarı Temurjon Komilov Ájiniyaz atındaǵı Nókis mámleketlik pedagogikalıq institutında student-jaslar ushın jaratılǵan sharayatlar menen tanıstı.

Atap aytqanda, oqıw imaratları, zamanagóy auditoriyalar, málimleme-resurs hám IT-inkubaciya orayları, laboratoriyalar kózden ótkerildi. Bilimlendiriw procesin bunnan bılay da jetilistiriw, jaslar ushın qolaylı hám zamanagóy ortalıqtı qáliplestiriw baǵdarında ámelge asırılıp atırǵan jumıslar joqarı bahalandı.

Sonday-aq, ministr orınbasarları studentler menen sáwbetlesip, olardıń pikir-usınısları, baslamaların tıńladı. Sáwbetlesiw dawamında tarawda ámelge asırıp atırǵan reformalardıń áhmiyeti, bilimlendiriw sapasın támiyinlew, oqıw procesi hám ilimiy jumıslar, jaslardı qollap-quwatlaw máseleleri boyınsha pikir almasıldı.

Ministr orınbasarları tárepinen joqarı potenciallı pedagog kadrlar tayarlaw jumısların bunnan bılay da jetilistiriw hám jaslar ushın qosımsha imkaniyatlar jaratıw baǵdarında juwapkerlerge tiyisli tapsırmalar berildi.

NMPI baspasóz xızmeti.