Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakulteti muzıkalıq tálim kafedrası tárepinen «Biz – Watandı jırlaymız» atamasındaǵı koncert baǵdarlaması shólkemlestirildi.

Bakalavriattıń muzıkalıq tálim baǵdarı studentleri jáne muzıkalıq tálim hám kórkem óner qánigeliginiń magistrantları atqarıwındaǵı koncert tolıq janlı atqarıldı.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov sózge shıǵıp, institutta qábiletli jaslardıń usınday koncert baǵdarlamasın shólkemlestiriw jaqsı dástúrge aylanıp atırǵanın atap ótip, onı shólkemlestiriwge basshılıq etken Ózbekstan xalıq artisti, muzıkalıq tálim kafedrasınıń docenti Aygúl Nadırovaǵa, húrmetli ustaz, docent Sofiya Tájetdinovaǵa, sonday-aq, kafedranıń pidayı professor-oqıtıwshılarına minnetdarshılıq bildirdi.

Koncert baǵdarlamasında studentler hám magistrantlar, kafedra janında shólkemlestirilgen «Sıy perde», «Tarannum», «Baldáwren», «Girjekshiler» ansamblleriniń aǵzaları qaraqalpaqsha, ózbekshe, qazaqsha, túrkmenshe, túrkshe qosıqlar, sonday-aq, dástúriy hám jáhán klassikalıq namaların atqardı.

Koncert baǵdarlaması qatnasıwshılarda umıtılmas tásirler qaldırdı.

NMPI baspasóz xızmeti.