Ájiniyaz atındaǵı Nókis mámleketlik pedagogikalıq institutında student-jaslardıń súwretlew óneri hám dóretiwshilikke bolǵan qızıǵıwshılıǵın arttırıw, qábiletli studentlerdi qollap-quwatlaw hám olardı belgili xudojniklerdiń tájiriybesi menen jaqınnan tanıstırıw maqsetinde «Dóretiwshilik zawqı» atamasındaǵı ushırasıw keshesi hám sheberlik sabaǵı shólkemlestirildi.

Súwretlew óneri hám injenerlik grafikası kafedrası tárepinen ótkerilgen ilajda Ózbekstan Kórkem óner dóretiwshileri awqamınıń aǵzaları, xudojnikler Timur Sulaymanov hám Qazaqbay Xojamuratovlar qatnasıp, ózleriniń dóretiwshilik jolı, kórkem ónerge kirip keliw procesi, shıǵarma dóretiwdegi ilham dárekleri, sonday-aq, zamanagóy súwretlew óneriniń búgingi rawajlanıw tendenciyaları haqqında aytıp ótti. Studentler xudojnikler menen sáwbetlesip, sorawlarına juwap aldı.

Sonıń menen birge, ilaj sheńberinde ótkerilgen sheberlik sabaǵında xudojnikler tárepinen reńdi tańlaw, kompoziciya jaratıw, kórinis arqalı ideya hám sezimlerdi sáwlelendiriwdiń áhmiyetli tárepleri boyınsha ámeliy kónlikpeler berildi.

Ilaj sheńberinde professor wazıypasın atqarıwshı Janjayxan Dármenov qatnasıwshılardı instituttaǵı Ájiniyaz muzeyi menen tanıstırdı.

NMPI baspasóz xızmeti.