Búgin, 20-fevral kúni Ájiniyaz atındaǵı Nókis mámleketlik pedagogikalıq institutında kiberqáwipsizlik hám jasalma intellekt boyınsha bay tájiriybege iye bolǵan «ARRTECH Corp» hám «Relisecure Corp» kompaniyalarınıń atqarıwshı direktorı Alper Cem Yilmaz, sonday-aq, Oraylıq Aziyadaǵı jetekshi IT-distribyutorlarınıń biri «Elcore Distribution Kazakhstan» kompaniyasınıń mámleketler boyınsha direktorı Nazgul Taimova hám jetekshi kommunikaciya menedjeri Aynur Maksim menen ushırasıw bolıp ótti.

Ushırasıwda Qaraqalpaqstan Respublikası Joqarǵı Keńesi Prezidiumı Sanlastırıw hám jasalma intellekt texnologiyaları sektorınıń baslıǵı Quwanıshbay Seytnazarov, institut rektorı wazıypasın waqıtsha atqarıwshısı Quvondiq Qodirov institutta málimleme texnologiyaların rawajlandırıw, oqıw procesin sanlastırıw, kiberqáwipsizlikti támiyinlew, sonday-aq, jasalma intellekt texnologiyalarınan nátiyjeli paydalanıw baǵdarında ámelge asırılıp atırǵan jumıslar haqqında maǵlıwmat berdi.

Ilajda miymanlar «Siberkoza» joybarı arqalı Túrkiya, Ázerbayjan, Qazaqstan, Pakistan mámleketlerindegi 7 universitette shólkemlestirilgen laboratoriyalar járdeminde jańa áwlad kiberqáwipsizlik hám jasalma intellekt qánigelerin tayarlaw jáne qollap-quwatlaw jumısları alıp barılıp atırǵanın atap ótti.

Ushırasıw dawamında institutta usı joybar sheńberinde, sonday-aq, kiberqáwipsizlik, jasalma intellekt hám aldınǵı texnologiyalar boyınsha strategiyalıq investiciya jáne birge islesiw máseleleri dodalandı.

Ilajdan soń miymanlar instituttıń IT-inkubaciyalıq orayınıń jumısları menen tanıstı.

NMPI baspasóz xızmeti.